فون کی جاسوسی؟اب ہر فون میں سنچار ایپ لازمی۔ بیرسٹر اسد الدین اویسی نے کی فیصلہ پر تنقید

نئی دہلی: حکومت نے موبائل ہینڈ سیٹس کی اصلیت کی تصدیق کے لیے موبائل فونس میں سنچار ساتھی ایپ کو پہلے سے ہی انسٹال کرنے کے احکامات جاری کیے ہیں۔سرکاری بیان کے مطابق شہریوں کو غیر

 

اصلی موبائل فون خریدنے سے بچانے، ٹیلی مواصلات کے وسائل کے مشتبہ غلط استعمال کی آسانی سے اطلاع دینے اور سنچار ساتھی پروگرام کی مؤثر عمل آوری بڑھانے کے مقصد سے ٹیلی مواصلات کے محکمے نے موبائل فون بنانے والی کمپنیوں اور درآمدکاروں کو بھارت میں استعمال کیلئے تیار کیے جانے والے یا درآمد کیے جانے والے تمام موبائل فونز میں سنچار ساتھی موبائل ایپ کو لازمی طور پر

 

پہلے سے اِنسٹال کرنے کی ہدایت دی ہے۔محکمے نے کہا کہ پہلے سے انسٹال شدہ سنچار ساتھی ایپ فون کے پہلے استعمال یا سیٹ اَپ کے وقت صارف کیلئے واضح طور پر نظر آنا اور قابلِ رسائی ہونی چاہیے۔ محکمے نے یہ بھی واضح کیا کہ ایپ کی خصوصیات کو کسی بھی طرح غیر فعال یا محدود نہیں کیا جانا چاہیے۔محکمے نے موبائل بنانے والی کمپنیوں اور درآمد کاروں کو ہدایت دی ہے کہ وہ کوشش کریں کہ یہ ایپ ان ڈیوائسز میں بھی سافٹ ویئر اپڈیٹ کے

 

ذریعے شامل کی جائے جو پہلے ہی تیار ہو چکی ہیں اور بھارت میں فروخت کے مراکز میں موجود ہیں۔محکمے نے کمپنیوں سے کہا ہے کہ 90 دن کے اندر اس ہدایت پر عمل درآمد مکمل کریں اور 120 دن کے اندر رپورٹ داخل کریں۔ اپوزیشن کا کہنا ہے کہ اس اقدام کے ذریعہ حکومت اب ہر وقت آپ کے فون میں بشکل جاسوس موجود رہے گی، حکومت کا ایک ایسا ایپ ہر وقت آپ کے فون میں رہے گا جو آپ کی ہر

 

سرگرمی پر نظر رکھے گا، فون پر ہونے والی باتوں کو سنے گا، آپ کا میسج پڑھے گا وغیرہ وغیرہ۔ اتنا ہی نہیں یہ ایپ موبائل میں پہلے سے انسٹال ہو کر آئے گا اور آپ اسے اپنے فون سے ہٹا بھی نہیں سکتے ہیں یعنی ڈیلیٹ نہیں کر سکتے ہیں۔اس دوران صدر کل ہند مجلس اتحاد المسلمین اور رکن پارلیمنٹ حیدرآباد بیرسٹر اسد الدین اویسی نے الزام لگایا کہ یہ شہریوں کی پرائیویسی کو ختم کرنے کے لیے

 

نریندر مودی حکومت کی ایک اور کوشش ہے اس اقدام سے عوام سرکاری جاسوسی کا شکار ہو سکتے ہیں۔