"نہ مجھے بیوی کا مسئلہ، نہ مودی کو” — راہول گاندھی کے جملے پر لوک سبھا میں قہقہوں کی گونج

لوک سبھا میں قہقہوں کی گونج — راہول گاندھی کے دلچسپ جملوں نے ماحول بدل دیا

 

نئی دہلی: پارلیمنٹ میں عموماً سنجیدہ مباحث دیکھنے کو ملتے ہیں، مگر اس بار خواتین ریزرویشن سمیت اہم بلوں پر بحث کے دوران راہول گاندھی نے اپنے ہلکے پھلکے اور دلچسپ انداز سے ایوان کا ماحول خوشگوار بنا دیا۔

 

اپنی تقریر میں انہوں نے خواتین کو ملک کی اصل طاقت قرار دیتے ہوئے کہا کہ ہر انسان اپنی زندگی میں ماں، بہن یا بیوی سے بہت کچھ سیکھتا ہے اور انہی سے متاثر ہوتا ہے۔ اسی دوران انہوں نے وزیر اعظم نریندر مودی کا حوالہ دیتے ہوئے مزاحیہ انداز میں کہا، “نہ مجھے اور نہ ہی وزیر اعظم کو ‘بیوی کا مسئلہ’ ہے”، جس پر ایوان میں زبردست قہقہے گونج اٹھے۔

 

راہول گاندھی نے اپنی بہن پرینکا گاندھی کی تعریف کرتے ہوئے کہا کہ انہوں نے صرف چند منٹوں میں وہ کام کر دکھایا جو وہ 20 سالہ سیاسی زندگی میں نہ کر سکے، یعنی امت شاہ کو مسکرانے پر مجبور کرنا۔ اس جملے پر بھی ایوان میں مسکراہٹوں کی لہر دوڑ گئی۔

 

راہول گاندھی کی اس تقریر نے نہ صرف سنجیدہ بحث کے درمیان ہنسی کا رنگ بھر دیا بلکہ یہ لمحہ پارلیمنٹ کی حالیہ کارروائی کا سب سے دلچسپ پہلو بن گیا۔