کینسر کے مریضوں کی خاموش مدد کرنے والا بے غرض محسن سلمان خان
ممبئی: بالی ووڈ سپر اسٹار سلمان خان اپنی دریا دلی کے لیے جانے جاتے ہیں لیکن بہت کم لوگ جانتے ہیں وہ بغیر کسی دکھاوے کے خاموشی کے ساتھ سماجی کام کرتے ہیں۔
حال ہی میں ان کے جنم دن کے موقع پر مصنف اور اداکارہ وجی وینکٹیش نے کچھ قصے شیئر کیے۔ وجی گزشتہ 35 سالوں سے کینسر مریضوں کی دیکھ بھال سے وابستہ ہیں۔
انہوں نے بتایا کہ سلمان بچوں سے ملنے اسپتال جاتے ہیں علاج کا خرچ اٹھانے میں مدد کرتے ہیں اور ایک بار تو انہوں نے مرتے ہوئے مریض کو اپنی سونے کی بالیاں تک دے دی تھیں۔
سوشل میڈیا پلیٹ فارم ’انسٹاگرام‘ پر سلمان کے ساتھ ایک تصویر شیئر کرتے ہوئے وجی وینکٹیش نے لکھا کہ ’’آج میں آپ سب کے سامنے ایسے شخص کو پیش کر رہی ہوں جنہیں کسی پہچان کی ضرورت نہیں ہے۔
میں انہیں گزشتہ 20 سالوں سے جانتی ہوں۔ جب میں ان سے پہلی بار ٹاٹا اسپتال میں ملی تھی تو انہوں نے مجھے اپنا فون نمبر دیا تھا اور کہا تھا کہ جب بھی کسی کو مدد کی ضرورت ہو تو میں انہیں کبھی بھی فون کر سکتی ہوں۔
‘‘وجی نے بتایا کہ سلمان ہمیشہ اپنا نمبر ان کے پاس اپڈیٹ رکھتے تھے تاکہ کسی مریض کو مدد چاہیے ہو تو فوری طور پر رابطہ کیا جا سکے۔
انہوں نے ایک قصہ یاد کیا کہ جب سلمان 12 سال کی ایک کینسر متاثرہ بچی کو کیموتھراپی جاری رکھنے کے لیے سمجھایا اور حوصلہ دیا۔
انہوں نے لکھا کہ ’’اس بچی نے درد اور تکلیف کی وجہ سے علاج چھوڑنے کا ارادہ کر لیا تھا لیکن سلمان نے فون پر اس سے بات کی، پیار سے سمجھایا اور اسے علاج مکمل کرنے کے لیے راضی کر لیا۔
آج وہی بچی 27 سال کی خوش مزاج لڑکی ہے اور پبلک ایڈمنسٹریشن کے امتحان کی تیاری کر رہی ہے۔‘‘وجی نے پوسٹ میں مزید لکھا کہ سلمان اکثر اپنے مصروف شوٹنگ شیڈول سے وقت نکال کر کینسر سے متاثرہ بچوں سے ملنے پہنچ جاتے تھے۔
انہوں نے لکھا کہ ایک شام سلمان خان نے مجھے فون کیا اور کہا کہ وہ سیوری کے پاس ہیں شوٹنگ ختم ہو گئی ہے یا منسوخ ہو گئی ہے تو کیوں نہ بچوں کے وارڈ میں جا کر مریضوں سے ملیں۔ اس شام کے ای ایم اسپتال کے بچوں کے لیے وہ لمحہ بے حد خاص بن گیا۔
ویجی نے ایک جذباتی قصہ شیئر کرتے ہوئے بتایا کہ جب بھی سلمان کو کسی ایسے انسان کے بارے میں پتہ چلتا ہے جسے کینسر کی وجہ سے مدد کی ضرورت ہے وہ مجھے فوراً فون کرتے ہیں۔
ایک بار انہوں نے اپنی سونے کی بالی اتار کر مجھے دی اور کہا کہ اسے میرٹھ میں ہڈی کے کینسر سے متاثر اس لڑکے تک پہنچا دینا جو آخری سانسیں لے رہا ہے۔وجی نے انسٹاگرام پوسٹ میں یہ بھی لکھا کہ ایک بار سلمان نے اخبار میں پڑھا کہ ایک لڑکی
کو بون میرو ٹرانسپلانٹ کے لیے ڈونر چاہیے۔ سلمان نے مجھے فون کیا اور کہا کہ وہ اپنے بھائیوں کو لے کر آ رہے ہیں تاکہ دیکھا جا سکے کہ ان کا خون میچ کرتا ہے یا نہیں۔
انہوں نے یہ بھی یاد کیا کہ اندور سے آئے ایک چھوٹے مریض سے ملنے کے لیے سلمان نے شوٹنگ سے وقت نکالنے کا وعدہ کیا تھا۔ جب شوٹنگ منسوخ ہو گئی تو انہوں نے ہمیں اپنے گھر بلا لیا اور اس بچے کے ساتھ ایک گھنٹہ سے بھی زیادہ کا وقت گزارا۔
پوسٹ کے آخر میں وجی وینکٹیش نے لکھا کہ ’’دیویوں اور سجّنوں میں آپ سب کے سامنے پیش کرتی ہوں ایک اور صرف ایک سلمان خان۔ کینسر مریضوں کی دیکھ بھال میں میرے پرانے ساتھی۔
جنم دن کی بہت بہت مبارکباد، پیارے سلمان آپ کی طرح کوئی نہیں۔‘‘
