تمل ناڈو میں دو بسوں کی خوفناک ٹکر — 10 افراد ہلاک، 20 زخمی
تمل ناڈو کے ضلع سیواگنگا کے کمّنگوڈی کے قریب اتوار کی شام دو سرکاری بسوں میں خوفناک آمنے سامنے ٹکر کے نتیجے میں 10 افراد ہلاک اور 20 مسافر شدید زخمی ہوگئے۔ حادثہ پلّیارپٹّی سے تقریباً پانچ کلومیٹر دور تیروپتّور علاقے میں پیش آیا۔
پولیس کے مطابق موقع پر عوام اور دیگر مسافروں نے فوری ریسکیو کارروائی کرتے ہوئے کئی زخمیوں کو بُری طرح تباہ شدہ گاڑیوں سے نکالا۔ ایک بس تِرُوپور سے کارائیکوڈی جبکہ دوسری کارائیکوڈی سے ڈِنڈیگل کی سمت جا رہی تھی۔
حادثے کی تصاویر میں ایک بس کی ڈرائیور سائیڈ پوری طرح چھی پھٹی نظر آئی جبکہ ویڈیوز میں کئی نعشیں زمین پر قطار میں پڑی دیکھی گئیں۔ ایک خاتون کو ٹوٹی ہوئی ونڈ اسکرین سے چھلانگ لگاتے ہوئے دیکھا گیا، جبکہ ایک دوسری خاتون زخمی حالت میں خون بہتے ہوئے زمین پر بیٹھی تھی۔
ایمرجنسی ٹیموں نے زخمیوں کو فوری قریبی ہاسپٹل منتقل کیا۔ عہدیداروں نے بتایا ہے کہ حادثہ کی اصل وجہ اور متاثرین کی تازہ حالت کے بارے میں مزید معلومات کا انتظار ہے۔
جنوبی تمل ناڈو میں ایک ہفتے کے اندر آمنے سامنے بسوں کے تصادم کا یہ دوسرا بڑا سانحہ ہے۔ گزشتہ ہفتے ٹینکاسی ضلع میں دو پرائیویٹ بسوں کی ٹکر سے چھ افراد ہلاک ہوگئے تھے، جس کی وجہ تیز رفتار اور لاپرواہ ڈرائیونگ بتائی گئی تھی۔
