تریونتاپورم میونسپل کارپوریشن پر بی جے پی کا قبضہ – کیرالا میں بائیں باوز محاذ کی 45 سالہ حکمرانی خطرہ میں
بی جے پی کی قیادت والی نیشنل ڈیموکریٹک الائنس (این ڈی اے) نے کیرالا کے بلدیاتی انتخابات میں بڑی کامیابی حاصل کرتے ہوئے تریونتاپورم میونسپل کارپوریشن میں سب سے بڑی جماعت کے طور پر ابھرتے ہوئے لیفٹ ڈیموکریٹک فرنٹ (ایل ڈی ایف) کی 45 سالہ حکمرانی کا خاتمہ کر دیا ہے۔
کارپوریشن کے 101 وارڈس میں سے این ڈی اے نے 50 نشستیں حاصل کیں، جبکہ برسراقتدار ایل ڈی ایف محض 29 نشستوں تک محدود ہو گیا۔ کانگریس کی قیادت والے یونائیٹڈ ڈیموکریٹک فرنٹ (یو ڈی ایف) نے 19 نشستیں جیتیں، دو نشستیں آزاد امیدواروں کے حصے میں آئیں، جبکہ ایک وارڈ میں گزشتہ ہفتہ امیدوار کے انتقال کے باعث پولنگ منسوخ کر دی گئی۔
ان نتائج سے شہر کے سیاسی توازن میں واضح تبدیلی سامنے آئی ہے اور این ڈی اے کو نئی کارپوریشن انتظامیہ تشکیل دینے کی مضبوط پوزیشن حاصل ہو گئی ہے۔ یہ کامیابی اس لئے بھی خاص اہمیت رکھتی ہے کہ تریونتاپورم ضلع سینئر کانگریس قائد اور رکنِ پارلیمنٹ ششی تھرور کا آبائی حلقہ ہے، جو ریاستی دارالحکومت میں بی جے پی کی بڑی پیش رفت کو نمایاں کرتا ہے۔
این ڈی اے نے ایک اور اہم کامیابی کے طور پر تریپونیتھورا میونسپلٹی پر بھی کنٹرول حاصل کر لیا، جہاں اس نے ایل ڈی ایف کو اقتدار سے بے دخل کر دیا۔ ہفتہ کے روز 2025 کے کیرالا بلدیاتی انتخابات کی گنتی مکمل ہونے کے ساتھ یہ نتائج سامنے آئے۔
مجموعی طور پر یہ نتائج کیرالا میں بی جے پی کیلئے ایک بڑی کامیابی کی علامت ہیں، خاص طور پر شہری علاقوں میں جہاں پارٹی کو اب تک ووٹ شیئر کو مقامی اداروں کے کنٹرول میں تبدیل کرنے میں مشکلات پیش آتی رہی ہیں۔
سیاسی تجزیہ نگاروں کی جانب سے تریونتاپورم کارپوریشن پر بی جے پی کا قبضہ اس انتخابی مرحلے کی سب سے نمایاں کامیابی قرار دیا جا رہا ہے۔ اس فتح نے ریاستی دارالحکومت میں ایل ڈی ایف کی دہائیوں پر محیط بالادستی کا خاتمہ کر دیا اور شہری ووٹروں کے رجحان میں واضح تبدیلی کی نشاندہی کی ہے۔
