چندراپور میں شیر سڑک پر بیٹھ گیا – راہگیروں کے پسینے چھوٹ گئے – گھنٹوں ٹریفک جام
مہاراشٹر کے ضلع چندرپور سے سامنے آنے والی ایک ویڈیو سوشل میڈیا پر تیزی سے وائرل ہوگئی ہے، جس میں تاڑوبا کے قریب چندرپور–موہَرلی روڈ پر ایک نہایت نایاب مگر خطرناک منظر قید ہوا ہے۔
ویڈیو میں مادھو نامی شیرنی کے بچے سمجھے جانے والے ایک شیر کو سڑک کے درمیان پرسکون انداز میں بیٹھے دیکھا جاسکتا ہے، جس کے باعث ٹریفک کئی گھنٹوں تک مکمل طور پر رکا رہا۔
یہ واقعہ تاڑوبا ٹائیگر ریزرو کے بفر زون میں پیش آیا، جو گھنے جنگلات اور جنگلی جانوروں کی آزادانہ نقل و حرکت کے سبب اکثر و بیشتر وائلڈ لائف کی جھلک دکھانے کے لیے جانا جاتا ہے۔ ویڈیو مقامی رہائشی آکاش عالم نے اس وقت ریکارڈ کی جب وہ اسی راستے سے گزر رہے تھے
۔ کلپ میں دیکھا جاسکتا ہے کہ سیاح اور گاؤں والے اپنی گاڑیوں کے اندر صبر سے بیٹھے ہوئے شیر کے خود ہٹ جانے کا انتظار کر رہے ہیں تاکہ وہ اپنی منزل کی طرف روانہ ہوسکیں۔
مقامی باشندوں کے مطابق اس شاہراہ پر جنگلی جانوروں کا دکھائی دینا اب معمول بنتا جا رہا ہے، خاص طور پر علی الصبح اور شام کے وقت۔ چونکہ چندرپور–موہرلی روٹ آس پاس کے دیہات کی ایک اہم آمد و رفت کا ذریعہ ہے،
اس لئے انسانوں اور جنگلی جانوروں کا آمنے سامنے آنا بڑھتا جا رہا ہے۔ محکمہ جنگلات کی جانب سے مسافروں کو بارہا ہدایت کی جاتی ہے کہ جانوروں کی موجودگی میں گاڑی سے ہرگز نہ اتریں، ہارن نہ بجائیں اور مکمل احتیاط سے سفر کریں۔
اس سڑک پر اکثر شیروں اور دیگر جنگلی جانوروں کی آمد کے باعث دو پہیوں پر سفر کرنے والوں کے لیے خطرات سب سے زیادہ ہیں۔ اچانک جنگلی جانور کے سامنے آجانے سے جان لیوا حادثات کا اندیشہ رہتا ہے، اسی لئے محکمہ جنگلات علاقہ مکینوں اور سیاحوں سے اپیل کرتا ہے کہ محفوظ اوقات میں سفر کریں اور گاڑیوں کی رفتار کم رکھیں۔
