شادی کی تقریب میں 45 سالہ خاتون ڈانس کرتے ہوئے گر کر فوت ہوگئیں

تاملناڈو کی دارالحکومت چینئی میں ایک شادی کی تقریب خوشیوں سے اس وقت ماتم میں بدل گئی جب اسٹیج پر رقص کے دوران ایک خاتون اچانک گر کر فوت ہوگئیں ۔ متوفیہ کی شناخت 45 سالہ جیوا کے طور پر ہوئی ہے، جو کانچی پورم سے اپنے شوہر کے ساتھ تقریب میں شریک تھیں۔ جیوا ایک معروف میڈیکل شاپ کے مالک کی اہلیہ تھیں اور ان کے دو بیٹے ہیں، ایک ایم بی بی ایس اور دوسرا فارمیسی کی تعلیم حاصل کر رہا ہے۔

واقعہ اس وقت پیش آیا جب مشہور گلوکار وِلموروگن حاضرین کو محفل کو مزید پرجوش بنانے کے لئے اسٹیج پر بلارہے تھے۔ جیوا بھی خوشی خوشی اسٹیج پر چڑھیں اور رقص کرنے لگیں لیکن کچھ ہی لمحوں بعد اچانک بے ہوش ہوکر گر پڑیں۔ فوری طور پر انہیں قریبی ہاسپٹل منتقل کیا گیا جہاں ڈاکٹروں نے مردہ قرار دے دیا۔

خوشیوں سے بھرا لمحہ دیکھتے ہی دیکھتے غم میں بدل گیا اور یہ افسوسناک منظر تقریب میں موجود افراد کے کیمروں میں قید ہوگیا۔