ہم ہر جگہ پہنچیں گے — گیان واپی اور شاہی عیدگاہ پر یوگی آدتیہ ناتھ کا براہِ راست اشارہ

اترپردیش کے چیف منسٹر کا اعلان: آئندہ  تمام مقامات تک پہنچیں گے — کاشی اور متھرا کے مساجد تنازعات کی طرف اشارہ

 

اتر پردیش کے چیف منسٹر یوگی آدتیہ ناتھ نے” ہندوستان لیڈر شپ سمٹ 2025″ سے خطاب کرتے ہوئے کہا کہ بابری مسجد کے معاملہ کے بعد حکومت اب تمام مقامات تک پہنچے گی، جس کا واضح اشارہ کاشی (وارانسی) اور متھرا میں موجود اہم مسلم تاریخی مقامات کی جانب تھا۔

 

جب انہیں وارانسی میں گیان واپی مسجد اور متھرا کی شاہی عید گاہ مسجد کے حوالے سے سوال کیا گیا تو آدتیہ ناتھ نے جواب دیا کہ ہم  تمام مقامات تک پہنچیں گے، اور ہم پہلے ہی پہنچ چکے ہیں۔ انہوں نے کہا کہ ایودھیا کا فیصلہ جمہوریت کی طاقت کو ظاہر کرتا ہے اور معاشرہ اپنی وراثت پر فخر محسوس کرے۔

 

تاہم حقوقی تنظیمیں اور اپوزیشن اسے مسلم عبادت گاہوں پر ریاستی اور سیاسی سطح پر مسلسل حملہ کے سلسلے کے طور پر دیکھتے ہیں۔ بابری مسجد کے انہدام (1992) اور 2019 کے عدالتی فیصلے کے بعد ہندو گروپس کی جانب سے دیگر مساجد "واپس لینے” کی کوششیں تیز ہو گئی ہیں۔

 

وارانسی میں درخواستیں دائر کی گئی ہیں کہ گیان واپی مسجد ایک منہدم شدہ مندر پر موجود ہے اور ہندو گروپس کے کنٹرول میں لائی جائے۔ متھرا میں بھی شاہی عیدگاہ مسجد کے خلاف مقدمات درج ہیں۔ تاہم مسلم تنظیمیں اور حقوق گروپس اس بات پر زور دیتے ہیں کہ یہ دعوے کمیونٹی کو نشانہ بنانے کے لیے ہیں۔