"لاپرواہ بیٹے کو سبق سکھانے باپ کا انوکھا فیصلہ — 3 کروڑ کی زمین حکومت کے نام، بیوی کی یاد میں عوامی خدمت کے لئے وقف”
تلنگانہ کے ہنمکنڈہ ضلع کے الکٹورتی گاؤں میں ایک باپ نے لاپرواہ بیٹے کو سبق سکھانے کے لیے انوکھا قدم اٹھایا سابق صدر منڈل پرجا پرشید شیام سندر ریڈی، جنہوں نے ساری زندگی اپنی اولاد کے بہتر مستقبل کے لیے محنت کی، آخرکار اسی بیٹے کی بے رُخی سے ٹوٹ کر رہ گئے۔
شیام سندر ریڈی نے بتایا کہ ان کا بیٹا رنجیت ریڈی، جو امریکہ سے واپسی کے بعد ہنمکنڈہ میں مقیم ہے، والدہ کی موت کے بعد ان کی کوئی خبر نہیں لیتا تھا اور چپکے سے ساری جائیداد اپنے نام کرالی تھی۔ اسی رویے سے دلبرداشتہ ہوکر انہوں نے اپنی زمین حکومت کے نام منتقل کر دی تاکہ بیٹے کو اس کا کوئی فائدہ نہ پہنچے
دکھی دل سے باپ نے وہ تین ایکڑ زمین — جس کی مالیت تقریباً 3 کروڑ روپے ہے — حکومت کے نام کر دی، تاکہ اس لاپرواہ بیٹے کو وراثت کا ایک انچ بھی نہ مل سکے۔
شیام سندر ریڈی نے میڈیا کو بتایا کہ ایسی اولاد کو اسی طرح کی سزا دینی چاہئے، کیونکہ بڑھاپے میں بیٹا سہارا بننے کے بجائے گھر سے نکال دیا۔ آنکھوں میں آنسو لیے انہوں نے مزید کہا کہ وہ چاہتے ہیں اس زمین پر اپنی مرحومہ اہلیہ وسنتا کی یاد میں ایک خوبصورت عمارت تعمیر ہو، جو عوامی خدمت کے کام آئے۔
ایک باپ کا دکھ، ایک شوہر کی محبت، اور ایک انسان کی قربانی — یہ کہانی آج ہر اس شخص کے دل کو جھنجھوڑ رہی ہے جو اولاد کے لیے سب کچھ قربان کر دیتا ہے۔
