ہریانہ میں نمبر پلیٹ کی بولی نے گاڑیوں کو بھی پیچھے چھوڑا — HR88B8888 ریکارڈ 1.17 کروڑ میں نیلام – پورے ملک میں ہلچل
ہریانہ میں ٹرانسپورٹ ڈیپارٹمنٹ کی جانب سے منعقدہ آن لائن نیلامی میں VIP کار رجسٹریشن نمبر HR88B8888 نے ملک بھر میں ریکارڈ قائم کرتے ہوئے حیرت انگیز طور پر 1 کروڑ 17 لاکھ روپے میں فروخت ہو کر ہندوستان کی اب تک کی سب سے مہنگی نمبر پلیٹ بن گئی
۔ اس کی بولی کی ابتدائی قیمت صرف 50 ہزار روپے مقرر تھی لیکن چند ہی گھنٹوں میں مقابلہ شدت اختیار کر گیا اور دوپہر تک اس نمبر کی قیمت 88 لاکھ روپے تک پہنچ گئی، جس کے بعد شام پانچ بجے نیلامی کے اختتام پر آخری بولی 1.17 کروڑ روپے پر فائنل ہوئی۔ اس منفرد نمبر کی سب سے بڑی کشش یہ تھی کہ اس میں موجود حرف “B” دیکھنے میں “8” جیسا لگتا ہے، جس کی وجہ سے پورا رجسٹریشن نمبر بظاہر مسلسل “آٹھوں” پر مشتمل دکھائی دیتا ہے
، جبکہ کئی طبقات اور ممالک میں ہندسہ 8 خوش قسمتی، دولت اور کامیابی کی علامت سمجھا جاتا ہے، اسی لیے اس نمبر پلیٹ کو حاصل کرنے کے لیے مجموعی طور پر 45 بولی دہندگان کے درمیان سخت مقابلہ ہوا۔ خریدار کی شناخت اور اس نمبر کو کس گاڑی پر استعمال کیا جائے گا،
حکام کی جانب سے ظاہر نہیں کیا گیا ہے، البتہ اس نیلامی نے VIP اور لکی نمبر پلیٹس کی خریداری کے بڑھتے ہوئے رجحان کو ایک نئی سطح پر پہنچا دیا ہے، خاص طور پر جبکہ پچھلے ہی ہفتے فروخت ہونے والا نمبر HR22W2222 تقریباً 37.91 لاکھ میں بکا تھا مگر محض سات دن بعد یہ ریکارڈ ٹوٹ گیا۔
ماہرین کے مطابق آئندہ دنوں میں منفرد، یادگار اور auspicious نمبروں کی ڈیمانڈ مزید بڑھے گی اور نیلامیوں میں نئی بلندیاں دیکھنے کو مل سکتی ہیں جب کہ ہریانہ سمیت کئی ریاستوں میں لوگ گاڑی سے زیادہ رجسٹریشن نمبر کو سٹیٹس سمبل کے طور پر دیکھنے لگے ہیں۔
