دہلی کی جامع مسجد کے در پر انسانیت کا چراغ — روزانہ سینکڑوں افراد کے لئے مفت افطار کا اہتمام کرتی ہیں نیہا بھارتی

جب پرانی دہلی میں سیرن بجنا شروع ہوتا ہے اور اذان کی آواز گونجتی ہے اور آسمان سنہری رنگ میں ڈھلنے لگتا ہے تو نیہا بھارتی کا اصل کام شروع ہوتا ہے۔

 

گزشتہ تین رمضان سے نیہا بھارتی روزانہ جامع مسجد کے گیٹ نمبر 3 کے باہر مفت افطار کا انتظام کر رہی ہیں، تاکہ آس پاس موجود کوئی بھی شخص بھوکا روزہ افطار نہ کرے۔

 

جہاں لوگ اپنے گھروں کا رخ کرتے ہیں، وہیں نیہا اپنے گھر والوں کے ساتھ باورچی خانے میں تیار کیا گیا کھانا لے کر باہر نکلتی ہیں۔ رمضان کے پورے تیس دنوں میں وہ روزانہ تقریباً 300 سے 350 افراد کو افطار کراتی ہیں۔ مذہب کی کوئی قید نہیں، ضرورت مند ہر شخص ان کی دسترخوان پر خوش آمدید ہوتا ہے۔

 

ان کی والدہ، والد اور بھائی خود کھانا تیار کرتے ہیں، جبکہ دوست پیکنگ اور تقسیم میں ہاتھ بٹاتے ہیں۔

 

جو کام ذاتی بچت سے شروع ہوا تھا، وہ آہستہ آہستہ ایک سماجی مہم بن گیا۔ لوگوں نے نقد رقم، چاول، پھل اور کھجور کی صورت میں تعاون دینا شروع کیا۔ اجنبی افراد مددگار بن گئے۔

 

دہلی یونیورسٹی سے تعلیم حاصل کرنے والی نیہا بھارتی “راہ” نامی ایک غیر سرکاری تنظیم بھی چلاتی ہیں، جو ضرورت مند بچوں کو مفت کتابیں فراہم کرتی ہے۔ ان کے نزدیک خدمت صرف ایک وقت کے کھانے تک محدود نہیں، بلکہ مواقع فراہم کرنے تک جاری رہتی ہے۔