پتنگ بازی کے دوران برقی شاک سے 13سالہ شیخ متین کی موت – تلنگانہ کے بودھن میں واقعہ

بودھن، 18 نومبر (اردو لیکس): ایک دل دہلا دینے والے واقعے میں، 13 سالہ لڑکا شیخ متین، آج صبح پتنگ بازی کے دوران ہائی وولٹیج تار سے کرنٹ لگنے کے سبب موقع پر ہی جاں بحق ہوگیا۔ یہ افسوسناک حادثہ حلقہ اسمبلی بودھن کے ایڈپلی منڈل کے موضع کرناپلی میں پیش آیا۔

 

تفصیلات کے مطابق شیخ متین، جو کرناپلی گورنمنٹ اسکول میں چھٹی جماعت کا طالب علم تھا، پتنگ نکالنے کی کوشش میں ایک درخت پر چڑھ گیا۔ بدقسمتی سے، درخت کی شاخیں ہائی وولٹیج تاروں سے ٹکرا گئیں، جس کے نتیجے میں وہ کرنٹ کی زد میں آ گیا اور موقع پر ہی دم توڑ دیا۔

 

شیخ متین کی موت سے اس کی والدہ، سیدہ بیگم، گہرے صدمے سے دوچار ہوگئیں۔ انہوں نے جذباتی طور پر کہا کہ ان کا بیٹا انہیں تنہا چھوڑ گیا ہے۔ ان کی آنکھوں سے غم کے آنسو رکنے کا نام نہیں لے رہے تھے۔

 

اس ناخوشگوار واقعے کے بعد، کرناپلی گاؤں میں غم کی لہر دوڑ گئی۔ گاؤں کے لوگوں نے محکمہ برقی کے عہدیداروں پر لاپرواہی کا الزام لگایا اور کہا کہ ہائی وولٹیج لائن کے قریب درخت کی شاخوں کو وقت پر نہ کاٹنے کی وجہ سے یہ حادثہ پیش آیا۔

 

محکمہ پولیس نے حادثے کا مقدمہ درج کرتے ہوئے نعش کو پوسٹ مارٹم کے لیے ضلع سرکاری دواخانہ بودھن منتقل کردیا ہے۔ اس المناک واقعے سے نہ صرف متوفی کے خاندان بلکہ پورے گاؤں میں غم کی لہر دوڑ گئی ۔