حیدرآباد کی تین مسلم نوجوان خواتین باکسرس – نیشلز انٹر کالج باکسنگ چیمپئن شپ میں تلنگانہ کی نمائندگی کریں گی

حیدرآباد کی تین مسلم نوجوان خواتین باکسرس نے شاندار کارکردگی دکھاتے ہوئے قومی سطح کے مقابلوں کے لئے کوالیفائی کرلیا ہے اور وہ پنجاب میں ہونے والے نیشلز انٹر کالج باکسنگ چیمپئن شپ میں تلنگانہ کی نمائندگی کریں گی۔

جمعرات کو نظام کالج میں منعقدہ عٹمانیہ یونیورسٹی انٹر کالج باکسنگ چیمپئن شپ میں مختلف کیٹیگریز میں حصہ لیتے ہوئے تینوں کھلاڑیوں نے نمایاں کارکردگی کے ذریعہ یہ اعزاز حاصل کیا۔ 18 سالہ سیدہ ام کلثوم (سینٹ اینز ویمنس کالج) نے 54 تا 57 کلوگرام کیٹیگری میں، 19 سالہ سیدہ ثریا ماہین (انوارالعلوم کالج) نے 51 تا 54 کلوگرام کیٹیگری میں جبکہ 19 سالہ شاہجہاں عثمان (نظام کالج) نے 65 تا 70 کلوگرام کیٹیگری میں بہترین فائٹس کا مظاہرہ کیا اور نیشنل میں اپنی جگہ بنائی۔

تینوں باکسرس اسپورٹس کوچنگ فاؤنڈیشن (ایس سی ایف) مانصاحب ٹینک، چاچا نہرو پارک میں سینئر کوچ محمد سعید کی نگرانی میں تربیت حاصل کر رہی ہیں، جہاں وہ روزانہ دو مرتبہ صبح 7 بجے سے 9 بجے تک اور شام 7 بجے سے 9 بجے تک سخت ٹریننگ کرتی ہیں۔

کوچ محمد سعید نے ان کی کامیابی پر مسرت کا اظہار کرتے ہوئے کہا کہ ان لڑکیوں نے تربیت کے دوران غیر معمولی ہمت، عزم اور یکسوئی کا مظاہرہ کیا ہے۔ تعلیمی دباؤ اور ذاتی چیلنجز کے باوجود انہوں نے کھیل سے وابستگی کم نہیں ہونے دی۔ قومی مقابلے کے لئے ان کا انتخاب نہ صرف میرے لئے بلکہ ان کے کالجوں اور تلنگانہ کے لئے بھی باعثِ فخر ہے۔ تینوں باکسرس کی پنجاب میں ہونے والے قومی انٹر کالج باکسنگ چیمپئن شپ میں شرکت ان کے کھیل کیریئر میں ایک اہم سنگِ میل ثابت ہوگی۔