1400کروڑ کا ٹیکس چوری اسکام۔ تلنگانہ کے سابق چیف سکریٹری کے خلاف مقدمہ درج
حیدرآباد ۔ حیدرآباد پولیس نے تلنگانہ کے سابق چیف سکریٹری سومیش کمار کے ساتھ چار دیگر افرت کے خلاف کئی کمپنیوں کے ذریعہ 1,400 کروڑ روپئے سے زیادہ کی جی ایس ٹی کی چوری سے متعلق اسکام کے معاملے میں مقدمہ درج کیا ہے۔
پولیس کے مطابق سابق چیف سکریٹری پر الزام ہے کہ آئی آئی ٹی۔حیدرآباد کی جانب سے ٹیکس ڈپارٹمنٹ کے ڈیزائن کردہ جانچ کے طریقہ کارمیں تبدیلی کے احکام جاری کرتے ہوئے بعض کمپنیوں کی حمایت کی گئی جس سے بے قاعدگیوں کا پتہ نہیں چل سکا۔سومیش کمار کا نام ایف آئی آر میں، کمرشل ٹیکس کے ایڈیشنل کمشنر ایس وی کاسی وشواسوارا راؤ، ڈپٹی کمشنر (حیدرآباد رورل) شیورام پرساد، آئی آئی ٹی حیدرآباد کے اسسٹنٹ پروفیسر سوبھن بابو، کے ساتھ درج کیاگیا ہے۔کمرشل ٹیکس کے جوائنٹ کمشنر روی کی طرف سے جی ایس ٹی کی ہزاروں کروڑ کی چوری کے بارے میں درج شکایت کی بنیاد پر سنٹرل کرائم اسٹیشن نے مقدمہ درج کیا اور سومیش کمار کو ملزم نمبر 5بنایا گیا ہے۔
اسکام میں ملوث افراد کے خلاف آئی پی سی کی دفعہ 406، 409، اور 120 بی کے ساتھ آئی ٹی ایکٹ کے تحت مقدمہ درج کیا گیا ہے۔ایف آئی آر کے مطابق، کمرشل ٹیکس آفس کی جانب سے کی گئی ابتدائی تحقیقات میں صرف اسٹیٹ بیوریجس کارپوریشن سے جی ایس ٹی میں 1,000 کروڑ روپے کے نقصان کا انکشاف ہوا، اور 400 کروڑ روپے 11 دیگر کمپنیوں کے ذریعہ چوری کیے گئے۔
تقریباً 75 کمپنیاں بے ضابطگیوں میں قصوروار پائی گئی ہیں۔ دریں اثنا یہ اطلاع ملی ہےکہ اس معاملے کی تحقیقات سی آئی ڈی کے حوالے کی جارہی ہے۔
