کاماریڈی میں کانگریس کے 4 سرپنچ بلا مقابلہ منتخب — 80 فیصد سرپنچ نشستوں پر جیت یقینی : محمد علی شبیر

کاماریڈی میں کانگریس کے 4 سرپنچ بلا مقابلہ منتخب — 80 فیصد سرپنچ نشستیں جیتنے کا امکان: محمد علی شبیر

 

کاماریڈی  ( ایم اے ماجد ) — کانگریس کے سینئر لیڈر و سرکاری مشیر محمد علی شبیر نے کہا ہے کہ کاماریڈی اسمبلی حلقہ میں گرام پنچایت سرپنچ کی 80 فیصد نشستوں پر کانگریس تائید یافتہ امیدواروں کی کامیابی یقینی نظر آرہی ہے۔ انہوں نے اس متوقع کامیابی کو کانگریس حکومت کے ترقیاتی اقدامات اور عوام دوست منصوبوں کا نتیجہ قرار دیا جو دیہی سطح پر پارٹی کی مضبوطی کا باعث بنے ہیں۔

 

کاماریڈی ٹاؤن میں ضلع کانگریس دفتر میں منعقدہ پریس کانفرنس سے خطاب کرتے ہوئے محمد علی شبیر نے بتایا کہ چار سرپنچ عہدوں پر کانگریس امیدوار بلا مقابلہ منتخب ہوچکے ہیں، کیوں کہ مخالف امیدواروں نے پرچہ نامزدگی داخل نہیں کیا۔ بلا مقابلہ منتخب ہونے والوں میں شامل ہیں:

• کیلوتھو پدما سوامی — وینکا تھانڈا (ماچاریڈی منڈل)

•  لکشمی راجم — ییلّم پیٹ گاؤں

• بانوٹھ سری رام — انکیریڈی پلی تانڈا

• مالوتھ سنتوش — بوداگٹہ تانڈا

 

محمد علی شبیر نے بتایا کہ تلنگانہ حکومت کی جانب سے متفقہ طور پر منتخب ہونے والے سرپنچوں کے لیے 10 لاکھ روپے کی ترغیبی رقم فراہم کی جارہی ہے، جب کہ کانگریس کی جانب سے ایم پی فنڈ، پارٹی ایس ڈی ایف الاٹمنٹ اور شخصی تعاون کے ذریعہ ہر سرپنچ کے لیے مزید 10 لاکھ روپے دلائے جائیں گے۔

 

انہوں نے بتایا کہ چیف منسٹر اے ریونت ریڈی کی قیادت میں کانگریس حکومت ریاست میں وسیع پیمانے پر فلاحی اسکیمیں نافذ کر رہی ہے۔ خواتین کی خود امدادی تنظیموں کے لیے ریاست بھر میں 304 کروڑ روپے کے بلاسودی قرضے جاری کیے جارہے ہیں، جن میں سے 3.25 کروڑ روپے کے چیکس صرف کاماریڈی حلقہ میں تقسیم کئے گئے ہیں۔ بلاسودی قرضوں کا تیسرا مرحلہ ریاست بھر میں جاری ہے۔

 

مزید کہا کہ کاماریڈی میں خواتین کے لیے 3500 اندراماں مکانات کی منظوری دی گئی ہے۔ گھریلو صارفین کو 200 یونٹ مفت برقی، باریک چاول سبسڈی قیمت پر، اور 500 روپے میں ایل پی جی سلینڈر فراہم کیا جارہا ہے۔ خواتین کے لیے مفت بس سفر اور اہل مستحق خواتین کو پٹرول بنکس الاٹ کرنے کی اسکیم بھی نافذ ہے۔