سسرال والوں کی ہراسانی سے دل برداشتہ داماد نے زہر پی کر خودکشی کرلی — میدک ضلع کے ویلدرتی میں المناک واقعہ، بیوی اور ساس سسر پر مقدمہ درج
سسرال والوں کی ہراسانی سے دل برداشتہ داماد نے زہر پی کر خودکشی کرلی — ویلدرتی میں المناک واقعہ، بیوی اور سسرالیوں پر مقدمہ درج
تلنگانہ کے میدک ضلع کے ویلدرتی منڈل مرکز میں ایک المناک واقعہ پیش آیا، جہاں بیوی کے گھر نہ آنے اور سسرال والوں کی ہراسانی سے تنگ آکر 32 سالہ ہری پرساد نامی نوجوان نے خودکشی کرلی۔ متوفی کا تعلق حیدرآباد کے جگدگیرگٹہ سے تھا۔
تفصیلات کے مطابق ہری پرساد کی شادی سال 2022 میں جگتیال ضلع کے میٹ پلی کی رہنے والی پوجا سے ہوئی تھی۔ اور یہ جوڑا میدک ضلع کے ویلدورتی میں مقیم تھا جوڑے کی دو سالہ بیٹی بھی ہے۔ تاہم شادی کے بعد سے ہی پوجا اور اس کے والدین مبینہ طور پر ہری پرساد پر الگ گھر لے کر علیحدہ رہنے کے لیے دباؤ ڈال رہے تھے۔
بتایا جاتا ہے کہ یکم نومبر کو بزرگوں کی موجودگی میں ہونے والی پنچایت میں بھی ہری پرساد کی اہانت کی گئی اور سخت الفاظ میں ڈانٹا گیا، جس کے بعد وہ شدید ذہنی تناؤ کا شکار ہوگیا۔ اسی پریشانی کے عالم میں 18 نومبر کو اُس نے کیڑے مار دوا پی لی۔ تشویشناک حالت میں ہاسٹل منتقل کیا گیا مگر علاج کے دوران آج اس کی موت واقع ہوگئی۔
واقعہ کے منظرِ عام پر آنے کے بعد پولیس نے بیوی پوجا اور اس کے والدین کے خلاف مقدمہ درج کرکے تحقیقات شروع کردی ہے۔
