دلسکھ نگر بم دھماکے کے کیس کے 5 ملزمین کو سزائے موت – تلنگانہ ہائی کورٹ نے سزا کم کرنے ملزمین کی درخواستیں کردی مسترد
ملک بھر میں سنسنی پھیلانے والے حیدرآباد کے دلسکھ نگر جڑواں بم دھماکوں کے مقدمے میں منگل کے روز تلنگانہ ہائی کورٹ نے ایک اہم فیصلہ سنایا۔
عدالت نے نچلی عدالت یعنی این آئی اے کی خصوصی عدالت کی جانب سے دی گئی سزائے موت کو برقرار رکھتے ہوئے، پانچ مجرموں کی اپیلوں کو مسترد کر دیا جنہوں نے اپنی سزاؤں کو منسوخ کرنے کی درخواست دی تھی۔ ہائی کورٹ نے این آئی اے عدالت کے فیصلے کی توثیق کی۔
یہ دھماکے 21 فروری 2013 کو حیدرآباد کے دلسکھ نگر علاقے میں بس اسٹاپ اور مرچی پوائنٹ کے قریب پیش آئے تھے، جن میں 18 افراد ہلاک اور 131 زخمی ہوئے تھے۔ اس کیس میں مرکزی ملزم محمد ریاض عرف ریاض بھتکل تاحال مفرور ہے،
جب کہ باقی پانچ ملزمان—اسداللہ اختر عرف ہدی، ضیاالرحمٰن عرف وقاس، محمد تحسین اختر عرف حسن، یاسین بھتکل عرف شارخ، اور اعجاز شیخ عرف سمر عرف ساجد—کو 13 دسمبر 2016 کو این آئی اے عدالت نے سزائے موت سنائی تھی۔
این آئی اے عدالت کے فیصلے کی توثیق کے لئے مقدمہ ہائی کورٹ میں پیش کیا گیا، اور ملزمین نے اس سزا کے خلاف اپیلیں بھی دائر کیں۔
جسٹس کے. لکشمن اور جسٹس پی. سری سودھا پر مشتمل بینچ نے تقریباً 45 دنوں تک سماعت کے بعد اپنا فیصلہ محفوظ رکھا اور آج این آئی اے عدالت کے فیصلے کی تائید کرتے ہوئے مجرموں کی اپیلیں خارج کر دیں۔
