حیدرا کے کمشنر رنگاناتھ پر تلنگانہ ہائی کورٹ برہم – عدالت میں پیش نہ ہونے پر غیر ضمانتی وارنٹ جاری کرنے کا انتباہ

تلنگانہ ہائی کورٹ نے حیدرا کے کمشنر اے وی رنگاناتھ کو سخت انتباہ دیتے ہوئے کہا کہ اگر وہ شخصی طور پر عدالت میں پیش نہ ہوں تو ان کے خلاف غیر ضمانتی وارنٹ جاری کیا جائے گا۔

بتکما کنٹہ تنازعہ کیس میں عدالت نے انہیں 5 دسمبر سے پہلے شخصی طور پر حاضر ہونے کے احکامات کے ساتھ نوٹس جاری کردی ہے۔ بتایا جاتا ہے کہ حیدرآباد کے بتکما کنٹہ حدود میں موجود متنازعہ پرائیویٹ اراضی میں کسی بھی قسم کی تبدیلی یا تعمیرات نہ کرنے کے متعلق ہائی کورٹ کے احکامات کی خلاف ورزی کیے جانے پر عدالت نے اے وی رنگاناتھ کو توہینِ عدالت کے تحت ذاتی طور پر حاضر ہوکر وضاحت پیش کرنے کی ہدایت دی ہے ۔

واضح رہے کہ 12 جون کو عدالت نے حکم دیا تھا کہ متنازعہ اراضی پر جوں کی توں حالت برقرار رکھی جائے اور کسی بھی طرح کی تبدیلی نہ کی جائے، مگر ان احکامات کی خلاف ورزی کی گئی جس پر ای۔ سدھاکر ریڈی نے ہائی کورٹ میں توہینِ عدالت کی پٹیشن داخل کی

۔ آج اس معاملے کی دوبارہ سماعت کے دوران عدالت نے رنگاناتھ پر شدید ناراضی کا اظہار کیا اور واضح طور پر کہا کہ اگر وہ شخصی طور پر عدالت میں پیش نہ ہوئے تو ان کے خلاف نان بیلیبل وارنٹ جاری کرنا ناگزیر ہوگا۔