حجاب واقعہ کے خلاف تلنگانہ کے نلگنڈہ میں جمعیۃ علماء ہند کا زبردست احتجاج، نتیش کمار سے فوری معافی کا مطالبہ
بہار کے چیف منسٹر نتیش کمار کی جانب سے خاتون ڈاکٹر کا حجاب کھینچے جانے کے واقعہ کے خلاف تلنگانہ کے شہر نلگنڈہ میں جمعیۃ علماء ہند کی قیادت میں زبردست احتجاجی مظاہرہ کیا گیا۔ احتجاج میں اقلیتی طبقات، مختلف سیاسی جماعتوں کے قائدین، سماجی تنظیموں کے نمائندے موجود تھے۔
مظاہرین نلگنڈہ کے کلاک ٹاور سینٹر پر جمع ہوئے اور اس واقعہ کو خواتین کی عزت و وقار اور مذہبی آزادی پر براہِ راست حملہ قرار دیتے ہوئے شدید برہمی کا اظہار کیا۔ مظاہرے سے خطاب کرتے ہوئے مقررین نے کہا کہ حجاب کھینچنا محض ایک خاتون کی توہین نہیں بلکہ پورے سماج کی تذلیل ہے۔
احتجاج کے دوران اس بات پر زور دیا گیا کہ خواتین کا احترام ذات اور مذہب سے بالاتر ہے اور تمام مذاہب عورت کے وقار اور عزت کا درس دیتے ہیں۔ مقررین نے کہا کہ بھارت میں عورت کو ادی شکتی کا درجہ دیا جاتا ہے، ایسے میں کسی خاتون کے حجاب کی بے حرمتی پوری نسواں دنیا کی توہین کے مترادف ہے۔
احتجاجی مظاہرے سے خطاب کرتے ہوئے مولانا اکبر خان، سیکریٹری جمعیۃ علماء ہند نلگنڈہ نے کہا کہ یہ احتجاج صرف مسلم خواتین کے لیے نہیں بلکہ ملک کی ہر خاتون کے وقار اور حقوق کے تحفظ کی جدوجہد ہے، اور مطالبہ کیا کہ چیف منسٹر نتیش کمار فوری طور پر عوامی سطح پر معافی مانگیں۔
