عدالت کے حکم میں جگتیال آر ڈی او کا فرنیچر ضبط

عدالتی احکامات پر عمل نہ کرنے کے باعث تلنگانہ کے جگتیال کے آر ڈی او (ریونیو ڈویژنل آفیسر) دفتر کے فرنیچر کو  مقامی سب کورٹ کے عملہ نے جمعرات کو ضبط کرلیا۔

 

تفصیلات کے مطابق پداپلی–نظام آباد ریلوے لائن کی تعمیر کے لیے 2003 میں جگتیال منڈل کے لِنگم پیٹ علاقے کے 253 کسانوں سے تقریباً 100 ایکڑ زمین حاصل کی گئی تھی۔ اُس وقت حکومت نے فی ایکڑ 1.24 سے 1.30 لاکھ روپے تک معاوضہ ادا کیا۔

 

تاہم کسانوں کا کہنا تھا کہ ان کی زمین کی اصل قیمت اس سے کہیں زیادہ ہے۔ اس پر انہوں نے عدالت سے رجوع کیا۔ عدالت نے 23 جولائی 2010 کو فیصلہ سناتے ہوئے حکومت کو ہدایت دی کہ کسانوں کو فی ایکڑ 10.64 لاکھ روپے کے حساب سے معاوضہ ادا کیا جائے۔

 

عدالت کے اس فیصلے کے مطابق حکومت کو کسانوں کو مجموعی طور پر 4 کروڑ 82 لاکھ روپے ادا کرنے تھے، مگر یہ رقم تاحال ادا نہیں کی گئی۔ اس پر کسانوں نے دوبارہ عدالت میں شکایت درج کرائی۔

 

عدالت نے عدم ادائیگی پر برہمی ظاہر کرتے ہوئے آر ڈی او دفتر کی املاک — بشمول فرنیچر، الماریاں اور پنکھے — ضبط کرنے کا حکم دیا۔ عملے نے یہ سامان دفتر سے اٹھا کر عدالت کے احاطے میں منتقل کر دیا۔

 

دوسری جانب کسانوں نے عدالتی احکامات پر مسلسل عدم عمل کے خلاف آر ڈی او دفتر کے سامنے زبردست احتجاج کیا اور فوری معاوضہ ادا کرنے کا مطالبہ کیا۔