تلنگانہ جڑوں سے کٹی ہوئی حکومت ریاست پر حکمرانی کر رہی ہے: کے.کویتا

تلنگانہ جاگروتی کی صدر اور ایم ایل سی کے. کویتا نے کہا کہ اگر ریاستی حکومت آزادی کے مجاہد اور معروف شاعر داشرَتھی کرشنماچاری کی صد سالہ تقریبات منعقد نہیں کرے گی، تو جاگروتی کی جانب سے یہ تقاریب شاندار انداز میں منظم کی جائیں گی۔

 

جمعہ کے روز، کویتا نے حیدرآباد میں واقع قلعہ رامالیم کا دورہ کیا، جہاں داشرَتھی کو قید رکھا گیا تھا۔ میڈیا سے بات کرتے ہوئے انہوں نے کہا کہ داشرَتھی جیسی عظیم شخصیت کو نظر انداز کرنا انتہائی افسوسناک ہے۔ انہوں نے کئی بار حکومت سے گزارش کی تھی کہ صد سالہ تقریبات منعقد کی جائیں، لیکن حکومت کا رویہ انتہائی بے حس رہا۔

 

انہوں نے اعلان کیا کہ 22 جولائی کو داشرَتھی کی صد سالہ سالگرہ ہے، اس مناسبت سے آج سے لے کر اس دن تک تقریبات منانے کا مطالبہ کیا۔ اگر حکومت جولائی کے پہلے ہفتے تک اس بارے میں کوئی فیصلہ نہیں لیتی، تو 21 اور 22 جولائی کو تلنگانہ جاگروتی کے زیرِ اہتمام بڑے پیمانے پر تقریبات منعقد کی جائیں گی۔ انہوں نے کہا کہ ان تقریبات میں مشہور شاعر، مصنفین اور تحریک سے وابستہ شخصیات کو مدعو کیا جائے گا۔

 

کویتا نے الزام لگایا کہ ریاست میں برسر اقتدار کانگریس حکومت تلنگانہ کے کلچر، ورثے اور جذبے سے ناواقف ہے، جو افسوسناک ہے۔ انہوں نے داشرَتھی کو یاد کرتے ہوئے کہا کہ وہ آزادی کی تحریک میں اہم کردار ادا کرنے والے، عوام کو بیدار کرنے والے شاعر تھے، جنہوں نے نظام حکومت کی زیادتیوں کو اپنی قلم سے بے نقاب کیا۔

 

انہوں نے یہ بھی یاد دلایا کہ نظام کے دور میں، داشرَتھی اور وٹّیکوٹہ الوار سوا́می کو ایک ہی بیرک میں قید کیا گیا تھا، اور داشرَتھی نے اسی قلعہ رامالیم جیل سے "نا تلنگانہ کوٹی رتنالا وینا” (میرا تلنگانہ، لاکھوں جواہرات والی وینا) کا نعرہ دیا تھا۔

 

کویتا نے یہ بھی کہا کہ جب وہ ایم ایل سی بنی ، تو انہوں نے اپنی فنڈز سے 40 لاکھ روپے خرچ کر کے اس تاریخی مقام کی ترقی کے لیے کام کیا۔ کانگریس حکومت کے برسرِ اقتدار آنے کے بعد، انہوں نے کئی بار داشرَتھی کی یاد میں تقاریب کے انعقاد کا مطالبہ کیا، مگر حکومت نے اس پر کوئی توجہ نہیں دی۔ انہوں نے کہا کہ کانگریس حکومت نے صرف داشرَتھی کو ہی نہیں بلکہ برُدُر راجو راما راجو جیسے بزرگ ادیب کی صد سالہ تقریبات کو بھی نظر انداز کیا۔

 

عوامی مسائل پر تبصرہ کرتے ہوئے، کویتا نے کہا کہ بارش کا موسم شروع ہو چکا ہے، لیکن ابھی تک کسانوں سے دھان کی خریداری مکمل نہیں کی گئی۔ راشن کی دکانوں پر لوگ گھنٹوں قطار میں کھڑے رہتے ہیں اور حکومت اس پر توجہ نہیں دے رہی۔ انہوں نے کہا کہ حکومت نے جو وعدے کیے تھے، وہ سب جھوٹے ثابت ہو رہے ہیں، اور عوام جلد ہی اس حکومت سے حساب لیں گے۔