مدینہ منورہ بس سانحہ شہداء کے لواحقین سے کے کویتا کی ملاقات

مدینہ منورہ بس سانحہ

شہداء کے لواحقین سے کے کویتا کی ملاقات

واقعہ پر شدید صدمہ اور غم میں برابر شریک ہونے کا اظہار

ہر ممکنہ مدد اور ایکس گریشیا کی رقم میں اضافہ کا ریاستی حکومت سے مطالبہ

صدر تلنگانہ جاگروتی کلواکنٹلہ کویتا نے سعودی عرب میں پیش آئے المناک سڑک حادثہ میں 45 حیدرآبادی معتمرین کے شہید ہونے پر گہرے رنج و غم کا اظہار کیا۔ انہوں نے کہا کہ یہ سانحہ صرف متاثرہ خاندانوں کا نہیں بلکہ پورے تلنگانہ اور ملک کا اجتماعی درد ہے، جس نے ہر دل کو مغموم کر دیا ہے۔کویتا نے آج شہداء کے مکانات پہنچ کر ان کے اہل خانہ سےملاقات کی اور ان کے غم میں شریک ہوئیں۔

 

کویتا نےانہیں دلاسہ دیتے ہوئے کہا کہ تلنگانہ جاگروتی اس مشکل وقت میں مکمل طور پر ان کے ساتھ کھڑی ہے۔ ملاقات کے دوران شہداء کے اہل خانہ اشک بار تھے ۔انہوں نے اپنے پیاروں کی یادیں تازہ کرتے ہوئے واقعات بیان کئے، جنہیں سن کر ماحول مزید غمزدہ ہو گیا۔کویتا نے حکومت سے پرزور مطالبہ کیا کہ اس سانحہ کی سنگینی کو دیکھتے ہوئے شہداء کے اہل خانہ کے لئے اعلان کردہ پانچ لاکھ روپئے ایکس گریشیا میں اضافہ کیا جائے تاکہ ان خاندانوں کی عملی مدد ہو سکے۔

 

کویتا نے کہا کہ کانگریس حکومت جنگی خطوط پر انتظامات کرتے ہوئے ان اہل خانہ کی مدد کرے جو اپنے پیاروں کے گزر جانے پر یکا و تنہا ہوچکے ہیں ۔ انہوں نے نشاندہی کی کہ چند متاثرہ خاندان ایسے ہیں جنہیں ابھی تک سعودی عرب روانہ نہیں کیا گیا جو کہ انتہائی افسوسناک ہے۔

 

انہوں نے کہا کہ سعودی عرب میں شہید ہمارے معتمرین ہمارے بھائی اور بہنیں سیدھے جنت میں جائیں گے، مگر ان کے پیچھے رہ جانے والے خاندانوں کا درد سمجھنا اور ان کا سہارا بننا ہم سب کی ذمہ داری ہے۔