مکہ حادثہ: جاں بحق زائرین کی سعودی عرب میں تدفین۔ اظہر الدین

حیدرآباد ۔ تلنگانہ کے اقلیتی بہبود کے وزیر محمد اظہرالدین نے بتایا کہ موصولہ اطلاعات کے مطابق 47 تا 48 افراد اس حادثے میں جاں بحق ہوئے۔

 

 

انہوں نے کہا کہ حج ہاؤس میں ایک کنٹرول روم قائم کردیا گیا ہے تاکہ متاثرہ خاندانوں کو معلومات فراہم کی جاسکیں۔‌ریاستی وزیر نے کہا کہ حکومت ہر متاثرہ خاندان سے کم از کم ایک فرد کو سعودی عرب بھیجنے کا انتظام کرے گی۔ اگر کسی کے پاس پاسپورٹ نہیں ہے تو حکومت پاسپورٹ کا انتظام بھی کرے گی۔

 

 

اظہر الدین نے بتایا کہ جاں بحق افراد کی نعشیں بری طرح جھلس گئی ہیں اس لیے شناخت کے لیے DNA ٹیسٹ بھی کرایا جاسکتا ہے۔انہوں نے کہا کہ ان کی ہندوستانی قونصل جنرل سے بات ہوئی ہے جنہوں نے یقین دلایا کہ سعودی عرب میں ہی تدفین کا انتظام کیا جائے گا۔ انہوں نے کہا کہ عام طور پر سعودی عرب میں وفات پانے والے زائرین کی وہیں تدفین کی جاتی ہے۔

 

انہوں نے مزید بتایا کہ وزیر اعلیٰ ریونت ریڈی نے متاثرہ خاندانوں کو ہر ممکن مدد فراہم کرنے کی ہدایت دی ہے۔