تلنگانہ کے ناگرجنا ساگر ڈیم کے دروازے کھول دئے گئے – 18 سال بعد پانی کا اخراج

تلنگانہ کے ناگرجنا ساگر ڈیم میں بالائی علاقوں سے آنے والے زبردست سیلابی پانی کے سبب ذخیرہ آب مکمل بھر گیا ہے۔ نتیجتاً، حکام نے پراجیکٹ کے کرسٹ گیٹ کھول کر پانی کا اخراج شروع کر دیا۔ اس موقع پر ریاستی وزراء اُتم کمار ریڈی، کومٹ ریڈی وینکٹ ریڈی، اڈلور لکشمن کے علاوہ کئی اعلیٰ عہدیداروں نے شرکت کی۔

پراجیکٹ کی مکمل گنجائش 590.00 فٹ (یعنی 312.04 ٹی ایم سی) ہے، جب کہ موجودہ پانی کی سطح 586.60 فٹ تک پہنچ چکی ہے۔ گیٹیں کھولنے کے پیش نظر، نچلے علاقوں میں رہنے والوں کو محتاط رہنے کی ہدایت جاری کی گئی ہے۔

قابل ذکر بات یہ ہے کہ 18 سال کے وقفے کے بعد یہ پہلا موقع ہے کہ ایک مہینہ پہلے ہی ناگرجنا ساگر سے پانی چھوڑا جا رہا ہے۔