فون ٹیپنگ کیس: کے ٹی آر جوبلی ہلز پولیس اسٹیشن پہنچ گئے ، سخت سیکیورٹی نافذ

فون ٹیپنگ کیس میں اسپیشل انوسٹی گیشن ٹیم (ایس آئی ٹی) کے روبرو پیش ہونے  کے لئے بی آر ایس کے کارگزار صدر کے ٹی راما راؤ جمعہ کے روز تلنگانہ بھون سے روانہ ہو کر جوبلی ہلز پولیس اسٹیشن پہنچ گئے۔ اس موقع پر سابق وزیر اور سینئر بی آر ایس قائد ہریش راؤ بھی ان کے ہمراہ موجود تھے۔

کے ٹی آر کی ایس آئی ٹی کے سامنے پیشی کے پیش نظر جوبلی ہلز پولیس اسٹیشن اور اس کے اطراف سخت حفاظتی انتظامات کئے گئے تھے۔ پولیس نے پانچ گنا سیکیورٹی نافذ کرتے ہوئے پولیس اسٹیشن سے تقریباً 500 میٹر کے دائرے میں بیریکیڈس نصب کر دیے، جب کہ ایک کلومیٹر کے علاقے میں  پابندیاں عائد کی گئیں۔ سڑکوں پر پولیس کی بھاری نفری تعینات رہی اور آنے جانے والوں کی سخت جانچ پڑتال کی گئی۔

اسی دوران کے ٹی آر کے ساتھ پولیس اسٹیشن جانے والے پارٹی کارکنوں کو پولیس نے راستے میں روک دیا، جس پر کارکنوں میں ناراضی دیکھی گئی۔ پولیس کی مداخلت کے بعد کے ٹی آر اور ہریش راؤ دوبارہ تلنگانہ بھون پہنچ گئے، جہاں عمارت کے اطراف بھی بڑی تعداد میں پولیس ملازمین تعینات رہے۔

سخت سیکیورٹی اور ٹریفک پابندیوں کے باعث جوبلی ہلز پولیس اسٹیشن کے اطراف گاڑی چلانے والوں اور مقامی افراد کو شدید مشکلات کا سامنا کرنا پڑا۔ ٹریفک کی رفتار سست رہی اور کئی راستوں پر طویل قطاریں لگ گئیں۔ پولیس حکام کے مطابق یہ تمام انتظامات امن و امان برقرار رکھنے اور کسی ناخوشگوار واقعہ سے بچنے کے لئے کئے گئے ہیں۔