حیدرآباد شہر میں کل رات سے بارش کا سلسلہ جاری
حیدرآباد ۔ شہر میں کل رات سے موسلا دھار بارش کا سلسلہ جاری ہے، جس کے نتیجہ میں معمولاتِ زندگی شدید متاثر ہو رہے ہیں۔ گزشتہ شب 10 بجے کے بعد شہر کے مختلف علاقوں میں دوبارہ شدید بارش کا آغاز ہوا جو صبح تک جاری رہا۔
مسلسل بارش کے سبب نشینی علاقوں میں پانی جمع ہوگیا کئی سڑکیں تالاب کا منظر پیش کرنے لگیں اور نکاسی آب کے نظام کی ناکامی واضح طور پر نظر آئی۔جمعرات کی صبح دفاتر جانے والے ملازمین، اسکول و کالج کے طلبہ اور دیگر عام شہریوں کو شدید مشکلات کا سامنا کرنا پڑا۔
بیشترمقامات پر ٹریفک جام کی صورتحال پیدا ہوئی ۔ شہر کے کچھ علاقوں میں بجلی کی فراہمی بھی متاثر ہوئی جس سے شہریوں کو مزید پریشانی کا سامنا کرنا پڑا۔
محکمہ موسمیات نے خبردار کیا ہے کہ آنے والے 24 سے 48 گھنٹوں کے دوران مزید شدید بارش کا امکان ہے۔ جی ایچ ایم سی، ڈیزاسٹر ریسپانس فورس اور دیگر ادارے ہائی الرٹ پر ہیں اور پانی جمع ہونے والے مقامات سے پانی کی نکاسی کے لیے فوری اقدامات کیے جا رہے ہیں۔
حکام نے عوام سے اپیل کی ہے کہ غیر ضروری طور پر گھروں سے باہر نہ نکلیں اور احتیاطی تدابیر اختیار کریں۔
