آپ فیصلہ لیں گے یا ہم فیصلہ کریں؟ تلنگانہ کے منحرف ارکان اسمبلی کے معاملہ میں مسلسل تاخیر پر سپریم کورٹ کی اسپیکر پر ناراضگی
سپریم کورٹ کا اسپیکر پر سخت برہمی — منحرف ارکان کے معاملے میں تاخیر پر نوٹس، اگلے ہفتے تک فیصلہ لازمی
تلنگانہ کے منحرف ارکان اسمبلی کے معاملے میں مسلسل تاخیر پر سپریم کورٹ نے ریاستی اسمبلی کے اسپیکر پرساد کمار پر شدید ناراضگی ظاہر کی ہے۔ عدالت عظمیٰ کی بنچ نے سخت لہجے میں سوال کرتے ہوئے کہا کہ “آپ فیصلہ لیں گے یا ہم فیصلہ کریں؟”۔
منحرف ارکان کے خلاف کارروائی میں عدم دلچسپی اور تین ماہ گزرنے کے باوجود کوئی فیصلہ نہ کرنے پر بی آر ایس کے ورکنگ صدر کے ٹی آر نے سپریم کورٹ میں عدالت کی توہین (کنٹیمپٹ) کی درخواست دائر کی تھی۔ اس درخواست پر چیف جسٹس جسٹس بی۔آر۔ گَوائی کی سربراہی والی بنچ نے سماعت کرتے ہوئے اسپیکر کو نوٹس جاری کردیا اور چار ہفتوں میں جواب داخل کرنے کی ہدایت دی۔
عدالت نے سخت ریمارکس دیتے ہوئے کہا کہ تین ماہ تک فیصلہ نہ کرنا عدالت کی توہین کے مترادف ہے۔ بنچ نے واضح کیا کہ منحرف ارکان اسمبلی کے کیس پر اگلے ہفتے کے اندر فیصلہ سنانا ضروری ہے، ورنہ اسپیکر کو کینٹیمپٹ کارروائی کے لیے تیار رہنا ہوگا۔ چیف جسٹس نے مزید کہا کہ “ہم پہلے ہی وضاحت کرچکے ہیں کہ اسپیکر کو اس معاملے میں کوئی خصوصی آئینی تحفظ حاصل نہیں ہے۔”
چیف جسٹس نے طنزیہ انداز میں یہ تبصرہ بھی کیا کہ “نئے سال کی تقریبات وہ کہاں منانا چاہتے ہیں، یہ فیصلہ بھی اب خود ہی کرلیں!” — جس سے عدالتی ناراضگی واضح ہوگئی۔
اسپیکر کی جانب سے پیش ہوئے وکلاء مکل روہتگی اور ابھیشیک سنگھ نے عدالت کو یقین دلایا کہ وہ مقررہ مدت میں کارروائی مکمل کردیں گے۔ عدالت نے ہدایت دی کہ سماعت روزانہ کی بنیاد پر آگے بڑھائی جائے اور جلد از جلد حتمی فیصلہ سنایا جائے۔ سپریم کورٹ نے دوبارہ تاکید کی کہ اسپیکر کو ہر حال میں چار ہفتوں کے اندر جواب داخل کرنا ہوگا۔
