شفاف طریقے سے اساتذہ کے تبادلوں اور ترقیوں کا عمل انجام دیا جائے _ وزیر سبیتا اندرا ریڈی کی عہدیداروں کو ہدایت

حیدرآباد _17 جنوری ( اردولیکس) تلنگانہ کی  وزیر تعلیم سبیتا اندرا ریڈی نے محکمہ تعلیم کے عہدیداروں کو ہدایت دی ہے کہ ریاست میں اساتذہ کی ترقیوں اور تبادلوں کے عمل کو منصفانہ اور شفاف طریقے سے انجام دیا جائے۔ منگل کو انہوں نے دفتر میں اساتذہ کی پروموشن اور ٹرانسفر کے عمل کے حوالے سے کئے جانے والے انتظامات کا جائزہ لیا۔ انھوں نے عہدیداروں کو ہدایت دی   کہ وہ ترقیوں اور تبادلوں کے عمل کو مکمل شفافیت اور جوابدہی کے ساتھ اور غلطیوں سے پاک کریں۔

حکام کو ہدایت کی گئی ہے کہ وہ اساتذہ کی ترقیوں اور تبادلوں سے متعلق رہنما خطوط اور شیڈول کے بارے میں جلد حتمی فیصلہ کریں۔ کسی بھی قسم کے قانونی مسائل سے بچنے کے لیے مناسب احتیاطی تدابیر اختیار کی جائیں۔ انہوں نے کہا کہ چونکہ ویب کونسلنگ کے ذریعے اساتذہ کے تبادلوں کے لیے اقدامات کیے جا رہے ہیں، اس لیے حکام کی ذمہ داری ہے کہ وہ اس بات کو یقینی بنائیں کہ اس مقصد کے لیے استعمال کیے جانے والے سافٹ ویئر میں کوئی خرابی نہ ہو۔