تلنگانہ کے اسکولوں میں Reading Campaign کا آغاز
حیدرآباد: جو طلباء روزانہ کتابیں پڑھتے ہیں ان میں تخلیقی صلاحیتیں پروان چڑھتی ہیں، ان میں جدید خیالات پیدا ہوتے ہیں اور علم کی روشنی سے ان کی شخصیت میں نکھار پیدا ہوتاہے۔ اس کے ساتھ یہ عمل اظہار خیال کی صلاحیت کو پروان چڑھاتاہے۔ جو بچےغلطیوں کے بغیر لکھنے کے قابل ہوتے ہیں وہ باقاعدگی سے متن پڑھ سکتے ہیں اور وہ کچھ بھی سیکھ سکتے ہیں۔ تلنگانہ حکومت نے آج (پیر) سے ریاست بھر کے سرکاری اسکولوں میں ‘پٹھانوتسوم’ (مطالعہ کی مہمReading campaign) پروگرام کا آغاز کیا ہے تاکہ یہ یقینی بنایا جاسکے کہ بچے آزادانہ طور پر پڑھیں اور بہتر تعلیمی نتائج حاصل کریں۔ ریاستی حکومت کے نئے تعلیمی سال 2023-24 میں سرکاری اسکولوں میں مطالعہ کی مہم 26جون سے 31 جولائی تک چلائی جائے گی۔ محکمہ تعلیمات کے اعلیٰ حکام کی ہدایات کے مطابق پہلی سے دسویں جماعت تک کے امتحانات کا شیڈول جاری کر دیا گیا ہے۔ یہاں تک کہ کلاس میں پہلا نمبر حاصل کرنے والے طلباء بھی کبھی کبھی کتاب پڑھنے میں پیچھے رہ جاتے ہیں۔ حکومت کا مقصد ہر طالب علم کو پڑھنے کی عادی بنانا اور اسے آزاد قاری بنانا ہے۔ ہر پیریڈ کے آخری دس منٹ کو مطالعہ کے لئے مختص کیے گئے ہیں ۔
حکومتی ہدایات کے مطابق اسکولوں کی سطح پر تمام صدر مدرسین معلمین و معلمات کو اس پروگرام کو انجام دینا ہوگا۔ جماعت واری مطالعہ کی مہم صدر مدرسین کے زیر نگرانی ہونا چاہیے۔ ہر پیریڈ میں مضمون کی تدریس مکمل ہونے کے بعد پڑھائے گئے مضمون کو طلبہ کے ساتھ آخری 10 منٹ میں پڑھنا چاہیے۔ سبق کے الفاظ کو تختہ سیاہ پر لکھ کر آویزاں کیا جائے تاکہ ہر طالب علماسے سمجھ سکے۔ یہ مہم روم ٹو ریڈ ، سنٹرل اسکوائر فاؤنڈیشن اورمحکمہ تعلیمات کی طرف سے لاگو کیا جانے والا سب سے باوقار پروگرام ہے۔
اس مہم میں سیو دی چلڈرن فاؤنڈیشن، یونیسیف، اور کئی دیگر خیراتی ادارے شراکت دار ہیں۔
*لائبریری کا دورانیہ*
اسکولوں میں کتابوں کے ساتھ قالین اور لکڑی کی میزیں فراہم کی گئیں ہیں۔ اس کے علاوہ محکمہ تعلیمات نے پرائمری اور ہائی اسکولوں میں بھی لائبریری کلاسز کے انعقاد کے احکامات جاری کیے ہیں۔ اس سلسلے میں ہر جماعت کے لیے دن میں ایک لائبریری پیریڈ کا اہتمام کیا جائے۔ اس کے علاوہ تین دن مادری زبان میں کہانیاں اور مزید تین دن انگریزی میں کہانیاں سنائی جائیں۔ پہلی سے پانچویں جماعت تک پانچ طلباء پر مشتمل ایک کمیٹی اور چھٹی سے نویں جماعت تک ایک کمیٹی بنائی جائے گی۔ کمیٹی میں ماہرین تعلیم کو شامل کیا جائے اور اساتذہ کو چاہیے کہ وہ لائبریری میں دستیاب کتابوں کا انتخاب کلاس میں بچوں کی دلچسپی کے مطابق کریں اور انہیں پڑھنے کی ترغیب دیں۔ نیز طلباء کو ان کے پڑھنے کی سطح کے مطابق گروپس میں تقسیم کیا جائے اور انہیںایک دوسرے کی مدد کرنے والے بنائیں۔
لائبریری میں کتابیں اور رسالے طلباء کو دیے جائیں تاکہ وہ اسکول اور گھر جا کر بھی کتابیں پڑھ سکیں۔ بچے گھر میں کیسے پڑھتے ہیں۔والدین کو وقتاً فوقتاً اس کی نگرانی کرنی چاہیے۔
*سوشل میڈیا پر پروموشن*
جب طلباء اسکول کی لائبریری میں پڑھ رہے ہوں تو ویڈیو بنائی جائے اور اسکول کے گروپوں کے ساتھ ساتھ والدین، ضلع اور ریاستی سطح کے عہدیداروں کو بھیجا جائے۔ تعلیم میں مسابقت کو بڑھانے کے لیے ہر ہفتہ کو پڑھنے کے مقابلوں کا انعقاد کیا جانا چاہیے۔ نیز ہر اسکول کو 10 سے 15 جولائی تک لائبریری ہفتہ منعقد کرنا چاہیے۔
تدریسی نتائج( اکتسابی ماحصل)
حکومت تلنگانہ کی جانب سے مطالعہ کی مہم (Reading Campaign) طلباء کی زندگیوں , میں تبدیلی کی ضامن ہے ،اور انہیں سنہری مستقبل کی جانب گامزن کرنے میں معاون ثابت ہو گی۔ بڈی باٹا پروگرام کے ذریعے سرکاری اسکولوں میں داخلے کا فیصد بڑھانے میں اساتذہ کی کوشش قابل داد و تحسین ہے اس کے ساتھ ساتھ آج سے جو نئی مطالعہ کی مہم چلائی جارہی ہے اسے بھی اسی جذبے سے کامیابی سے ہمکنار کیا جائے اور ضلع کو ریاست میں اوّل مقام پر رکھا جائے۔ طلباء کو پڑھنے میں مشغول کرنے سے بچوں کو اکتسابی نتائج حاصل کرنے میں مدد ملتی ہے۔
