عدالت نے مسلم مجرم کو دی پانچ وقت نماز ادا کرنے اور مسجد میں پودے لگانے کی سزا _ یہ فیصلہ کسی اسلامی ملک کی عدالت کا نہیں بلکہ ہندوستانی عدالت کا

حیدرآباد _ یکم مارچ ( اردولیکس ڈیسک) مہاراشٹر کے ناسک ضلع کے مالیگاؤں کی ایک عدالت نے سڑک حادثے کے تنازعہ کے ایک مسلم مجرم کو دن میں پانچ مرتبہ نماز پڑھنے اور روزانہ دو پودے لگانے کا حکم دیا۔ قابل ذکر ہے کہ اس نے جو جرم کیا تھا اس کی سزا ایک سال قید تھی اس کے باوجود  عدالت نے اسے سلاخوں کے پیچھے ڈالنے کے  بجائے پودے  لگانے اور نماز پڑھنے کا حکم دیا ہے۔

 

مجسٹریٹ تیجونت سنگھ سندھو نے اپنے فیصلے میں نوٹ کیا کہ پروبیشن آف آفنڈرز ایکٹ کی دفعات نے مجسٹریٹ کو کسی مجرم کو نصیحت یا مناسب وارننگ کے بعد رہا کرنے کا اختیار دیا ہے تاکہ اس بات کو یقینی بنایا جا سکے کہ وہ جرم کا اعادہ نہ کرے۔ معزز جج نے حکم نامے میں کہا کہ ’’میرے مطابق مناسب وارننگ دینے کا مطلب یہ ہے کہ یہ سمجھنا کہ جرم ہوا ہے، ملزم پر جرم ثابت ہو چکا ہے اور اسے ایسی سزا دی جائے کہ وہ اسے یاد رکھ کر  دوبارہ جرم نہ دہرائے۔

 

اس کیس کے مجرم، 30 سالہ رؤف خان کو 2010 میں گاڑی کے حادثے کے بعد ایک شخص پر حملہ کرکے زخمی کرنے کے الزام میں گرفتار کیا گیا تھا۔ کیس میں روف خان کو مجرم قرار دیتے ہوئے، عدالت نے مشاہدہ کیا کہ پورے مقدمے کی سماعت کے دوران، خان نے کہا کہ وہ روزانہ نماز نہیں پڑھتا۔ اس کے نتیجے میں، عدالت نے اسے  28 فروری سے 21 دنوں تک دن میں پانچ بار نماز ادا کرنے،اور  سونا پورہ مسجد کے میدان میں دو پودے  لگانے اور پودوں کی دیکھ بھال کرنے کا حکم دیا۔

 

عدالت نے اپنے  حکم میں کہا کہ چونکہ یہ جرم سونا پورہ مسجد کے احاطے کے قریب ہوا تھا، اس لئے خان کے لیے وہاں درخت لگانا مناسب ہوگا۔ عدالت نے مالیگاؤں کے ایگریکلچر آفیسر کو سزا کی  اس مدت کے دوران روف خان کی نگرانی کے لیے اسپیشل پروبیشن آفیسر کے طور پر مقرر کیا ہے۔ اگر ضروری ہو تو افسر کو پولیس فورس استعمال کرنے کا اختیار دیا گیا ہے۔ عدالت نے حکم کی تعمیل کو یقینی بنانے کے لیے مالیگاؤں کی سونا پورہ مسجد کے امام  کو فیصلے کی ایک کاپی بھیجنے کا بھی حکم دیا۔

 

رؤف خان پر انڈین کریمنل کوڈ کی دفعہ 323 (رضاکارانہ طور پر نقصان پہنچانا)، 325 (رضاکارانہ طور پر شدید تکلیف پہنچانا)، 504 (امن کی خلاف ورزی کا سبب بننے کے لیے جان بوجھ کر توہین) اور 506 (امن کی خلاف ورزی پر اکسانے کے لیے جان بوجھ کر توہین) کے تحت فرد جرم عائد کی گئی۔ )۔ عدالت نے اسے آئی پی سی سیکشن 323 کے تحت قصوروار پایا اور دیگر الزامات سے بری کر دیا گیا۔

آئی پی سی کی دفعہ 323 میں ایک سال تک کی قید، یا 1000 روپے تک جرمانہ، یا دونوں کی سزا ہے۔

 

قابل ذکر ہے کہ ناسک ضلع کا مالیگاؤں مسلم اکثریتی شہر ہے۔ یہ مالیگاؤں بم بلاسٹ کیس کے لیے زیادہ جانا جاتا ہے۔ مالیگاؤں کی عدالت نے ایک مجرم کو سزا کے بجائے مذہبی فرائض انجام دینے کا حکم دینے سے اس کیس کو اکثریتی فرقہ کے افراد تعجب سے دیکھ رہے ہیں