تلنگانہ میں جاریہ تعلیمی سال سرکاری اور پرائیویٹ میڈیکل کالجوں میں 934 اقلیتی طلبہ نے داخلہ لیا _ مسلم ریزرویشن کا اہم رول : محمد علی شبیر

حیدرآباد _ 5 جنوری ( اردولیکس) تلنگانہ کانگریس کے سینئر لیڈر و سابق وزیر  محمد علی شبیر نے دعویٰ کیا ہے کہ 4 فیصد مسلم ریزرویشن اور پیشرو کانگریس حکومت کے ذریعہ دیے گئے اقلیتی کالجوں نے تلنگانہ اور آندھرا پردیش میں ہزاروں غریب مسلمانوں کی زندگیوں میں انقلاب برپا کردیا ہے۔

 

گاندھی بھون میں ٹی پی سی سی کے سینئر نائب صدر ظفر جاوید اور دیگر قائدین کے ساتھ ایک پریس کانفرنس سے خطاب کرتے ہوئے شبیر علی نے بتایا کہ اس سال 42 سرکاری اور پرائیویٹ میڈیکل کالجوں میں 934 اقلیتی طلباء نے داخلہ لیا ہے۔ یہ ہندوستان کی کسی بھی ریاست میں میڈیکل کالجوں میں داخلہ لینے والے مسلم طلباء کی سب سے زیادہ تعداد ہے۔ یہ صرف 2004-05 میں اس وقت کی کانگریس حکومت کے ذریعہ متعارف کرائے گئے 4 فیصد مسلم ریزرویشن کی وجہ سے ہوا۔ مزید یہ کہ کانگریس کی سابقہ حکومت نے چار اقلیتی میڈیکل کالجوں کو منظوری دی تھی – دکن، شاداں، آیان اور ڈاکٹر وی آر کے ویمن میڈیکل کالجس۔ ان پالیسیوں نے مسلمانوں کو اعلیٰ تعلیم فراہم کرنے میں مدد کی ہے، خاص طور پر سماجی اور پسماندہ گروہوں کو جنہیں BC-E کے طور پر درجہ بندی کیا گیا ہے ۔

 

 

 

محمد علی شبیر نے کہا کہ جب ڈاکٹر وائی ایس راج شیکھرا ریڈی کی قیادت والی کانگریس حکومت نے 2004-05 میں 4فیصد  مسلم ریزرویشن نافذ کیا، تو ہم جانتے تھے کہ یہ آنے والی نسلوں کی زندگیوں میں انقلاب برپا کر دے گی۔ انچارج وزیر کے طور پر، مجھے پالیسی کو لاگو کرنے میں مختلف مراحل پر بہت سی رکاوٹوں کا سامنا کرنا پڑا۔ اقتدار میں آنے کے 58 دن بعد، اس وقت کی کانگریس حکومت نے 17 سے زائد محکموں سے منظوری حاصل کرنے کے بعد 5 فیصد مسلم ریزرویشن نافذ کیا، ہائی کورٹ کی ہدایت کے بعد کوٹہ کو 5فیصد  سے گھٹا کر 4 فیصد  کر دیا گیا، حالانکہ 4 فیصد مسلم ریزرویشن کا تسلسل جاری ہے۔ سپریم کورٹ کی آئینی بنچ کے حتمی فیصلے پر منحصر ہے، BC-E کے تحت ہزاروں سماجی اور اقتصادی طور پر پسماندہ مسلمانوں نے پچھلے 19 سالوں میں اس سے فائدہ اٹھایا ہے،

 

شبیر علی نے بتایا کہ سال 2022-23 کے لیے تلنگانہ میں ایم بی بی ایس کی 6,690 نشستوں میں سے اقلیتی طبقہ سے تعلق رکھنے والے طلبہ نے 934 نشستیں حاصل کیں۔ اقلیتوں/مسلمانوں کو سرکاری کالجوں میں 179، پرائیویٹ کالجوں میں 205 اور اقلیتی کالجوں میں 550 نشستیں ملی ہیں۔ ان میں زمرہ-اے (کنوینر کوٹہ) میں 603 نشستیں، زمرہ بی (منیجمنٹ کوٹہ) میں 209 اور زمرہ سی (این آر آئی کوٹہ) میں 122 نشستیں شامل ہیں۔ 4,409 نشستوں میں سے – زمرہ – A کے تحت، مسلمانوں کو 18 سرکاری میڈیکل کالجوں میں 179 نشستیں، 20 پرائیویٹ کالجوں میں 94 اور میڈیکل کالجوں میں 330 نشستیں حاصل ہوئیں۔ 20 پرائیویٹ کالجوں میں کیٹیگری بی (مینجمنٹ کوٹہ) میں 1096 سیٹیں ہیں اور اقلیتوں کو 73 ملیں اسی طرح پرائیویٹ کالجوں میں کیٹیگری سی میں 479 سیٹیں ہیں اور مسلمانوں کو 38 سیٹیں ملی ہیں۔ انہوں نے کہا کہ میں سیٹ حاصل کرنے والے تمام طلباء کو مبارکباد دینا چاہتا ہوں اور ان کے روشن مستقبل کے لیے نیک خواہشات کا اظہار کرتا ہوں،