کھمم میں گھر گھر جامع سروے کا آغاز – کلکٹر مذمل خان نے لیا جائزہ

کھمم میں گھر گھر جامع سروے کا آغاز ہو چکا ہے۔ اس سلسلے میں کھمم کے کلکٹر مذمل خان نے عوام سے اپیل کی ہے کہ وہ اس پروگرام میں بھرپور تعاون کریں۔ یہ سروے پروگرام تلنگانہ حکومت کی جانب سے 6 نومبر سے شروع کیا گیا ہے، جس کا مقصد غریب عوام کی فلاح و بہبود اور حکومتی اسکیمات کے لیے ضروری معلومات حاصل کرنا ہے۔ کلکٹر مذمل خان نے کھمم کے رورل منڈل کے پیندا تنڈا علاقے میں گھر گھر پہنچ کر عہدیداران کے ساتھ سروے کا جائزہ لیا۔

کلکٹر نے کہا کہ اس جامع سروے میں ہر خاندان کی مکمل تفصیلات اور ذات پات کا اندراج کرنا ضروری ہے، تاکہ حکومت کو ریاست میں ایس سی، ایس ٹی، اقلیتوں اور بی سی طبقات کے معاشی، تعلیمی اور روزگار کی صورتحال کا جائزہ مل سکے۔ انہوں نے عہدیداران کو ہدایت دی کہ سروے مکمل ہونے والے گھروں پر اسٹیکر لگائیں اور روزانہ کی رپورٹ ضلع انتظامیہ کو فراہم کریں۔

سروے کے دوران پیندا تنڈا کے عوام نے کلکٹر مذمل خان سے حالیہ سیلاب میں ہونے والے نقصانات پر حکومتی امداد کے متعلق شکایت کی۔ کلکٹر نے بتایا کہ کھمم ضلع میں سیلاب سے متاثرہ 25 ہزار خاندانوں کو امداد دی گئی ہے، جن میں پیندا تنڈا کے 830 افراد بھی شامل ہیں۔ مزید متاثرہ افراد کی شکایات کی جانچ کر کے انہیں امداد فراہم کی جائے گی۔ اس موقع پر ڈی آر ڈی او نور الدین اور ایم پی ڈی او کمار بھی موجود تھے۔