ملک کی 10 ریاستوں کی 96 لوک سبھا سیٹوں کے لئے پولنگ جاری _ تلنگانہ کی 17 سیٹ بھی شامل

حیدرآباد _ 13 مئی ( اردولیکس) عام انتخابات کے چوتھے مرحلے کے لیے پولنگ شروع ہو گئی ہے۔ پولنگ صبح 7 بجے سے شام 6 بجے تک ہوگی۔ پولنگ شروع ہونے کے بعد سے ووٹرز اپنے ووٹ کا حق استعمال کرنے کے لیے قطاروں میں کھڑے ہیں۔ اس مرحلے پر، تلنگانہ اور آندھرا پردیش سمیت 10 ریاستوں/ مرکز کے زیر انتظام علاقوں کے 96 لوک سبھا حلقوں میں پولنگ جاری ہے

 

۔ اس کے علاوہ، اے پی کی تمام 175 اسمبلی  اور 25 لوک سبھا سیٹوں کے لیے ایک ہی مرحلے میں  پولنگ چل رہی ہے، چوتھے مرحلے میں لوک سبھا کی 96 سیٹوں پر کل 1,717 امیدوار اپنی قسمت آزما رہے ہیں۔ الیکشن کمیشن نے 1.92 لاکھ پولنگ سٹیشن بنائے ہیں۔ تقریباً 17.70 کروڑ ووٹر اپنے حق رائے دہی کا استعمال کریں گے۔ ان میں 8.73 کروڑ خواتین ہیں۔

کس ریاست میں؟
ایک ہی مرحلے میں تلنگانہ کی 17 اور اے پی کی 25 سیٹوں کے لیے انتخابات ہو رہے ہیں۔ یوپی میں 13، بہار میں 5، جھارکھنڈ میں 4، مدھیہ پردیش میں 8، مہاراشٹر میں 11، اڈیشہ میں 4، مغربی بنگال میں 8 اور جموں و کشمیر میں ایک۔

تلنگانہ میں

ریاست کی 17 لوک سبھا سیٹوں کے ساتھ کنٹونمنٹ اسمبلی کے ضمنی انتخابات کے لیے پولنگ جاری ہے۔ ریاست بھر میں 3.32 کروڑ لوگ اپنے حق رائے دہی کا استعمال کریں گے۔ حکام نے ان کے لیے 35,809 مراکز قائم کیے ہیں۔ انتخابی میدان میں 625 امیدوار ہیں اور ان میں 50 خواتین ہیں۔ کنٹونمنٹ اسمبلی ایریا میں 2.51 لاکھ ووٹرز کے لیے 232 پولنگ اسٹیشن بنائے گئے ہیں۔ 13 اسمبلی حلقوں میں شام 4 بجے تک اور 106 حلقوں میں شام 6 بجے تک پولنگ ہوگی۔ ووٹوں کی گنتی 4 جون کو ہوگی۔

 

ریاست میں 2,08,163 لوگ پہلے ہی ووٹ ڈال چکے ہیں۔ معذور افراد اور 85 سال سے زیادہ عمر کے لوگوں نے مرکزی الیکشن کمیشن کی طرف سے گھر سے  ووٹنگ کی سہولت کے ساتھ اپنے ووٹ کا حق استعمال کیا۔ 1.88 لاکھ ملازمین نے بھی ووٹ ڈالا۔ تمام طبقات سے تعلق رکھنے والے 2.94 لاکھ لوگ پولنگ کے فرائض انجام دے رہے ہیں۔