حج پرمٹ کے بغیر مکہ میں داخلہ کی کوشش۔2 لاکھ 69 ہزار افراد کو روک دیا گیا
کے این واصف
حکومت کے بار بار انتباہ کے باوجود مقیم غیر ملکی حج کا اجازت نامہ حاصل کئے بغیر حج کرنے کی کوشش کرتے ہیں۔ سعودی محکمہ امن عامہ کے ڈائریکٹر اور حج سکیورٹی کمیٹی کے چیئرمین لیفٹیننٹ جنرل محمد البسامی نے کہا ہے کہ 400 سے زیادہ جعلی حج کمپنیوں اور دفاتر کا سراغ لگایا گیا اور ان کے خلاف کارروائی کی گئی ہے۔
الاخباریہ کے مطابق مشترکہ پریس بریفنگ کے دوران بتایا گیا کہ پرمٹ کے بغیر مکہ میں مقیم دو لاکھ پانچ ہزار افراد کو واپس کیا گیا جبکہ دو لاکھ 69 ہزار افراد کو مکہ میں داخلے سے روکا گیا۔ غیر قانونی عازمین کو لے جانے کی کوشش کرنے والے ایک ہزار239 افراد کو گرفتار کیا ہے۔ حج ضوابط کی خلاف ورزی پر 75 ہزار سے زائد افراد پر جرمانے عائد کیے گئے ہیں۔
سکیورٹی حکام حج کے ضوابط کی خلاف ورزی کرنے والے ہرایک شخص کے تعاقب میں ہوں گے۔ان کا کہنا تھا محکمہ امن عامہ نے حج ضوابط کی خلاف ورزی روکنے کے لیے مکہ مکرمہ کے داخلی راستوں پر مستقل سکیورٹی پوسٹیں قائم کی ہیں۔
محکمہ پاسپورٹ کے ڈائریکٹر جنرل ڈاکٹر صالح المربع نے بتایا بیرون ملک سے اب تک 14 لاکھ سے زیادہ عازمین حج مملکت پہنچ چکے ہیں۔
