تلنگانہ کے نظام آباد ضلع میں سافٹ ویر انجینر کی خودکشی – پولیس گاڑی پر نعش رکھ کر گھر والوں کا احتجاج

نظام آباد کے  ڈون چندا گاؤں میں عشق میں ناکامی پر سافٹ ویئر انجنیئر نے کرلی خودکشی — اہلِ خانہ کا پولیس گاڑی پر نعش رکھ کر احتجاج

 

نظام آباد، 28 نومبر (اردو لیکس) تلنگانہ کے نظام آباد ضلع کے ایرگٹلا منڈل کے ڈون چندا گاؤں سے تعلق رکھنے والے سافٹ ویئر انجنیئر سری کانت نے مبینہ طور پر عشق میں ناکامی کے باعث زہریلی دوا پی کر خودکشی کرلی۔

 

اطلاعات کے مطابق سری کانت گزشتہ چھ سال سے ایک لڑکی سے محبت کررہا تھا، تاہم لڑکی کے والدین اس رشتے کے لئے رضا مند نہیں تھے اور انہوں نے لڑکی کا رشتہ کسی دوسرے شخص سے طے کردیا۔

 

اس صورتحال سے دل برداشتہ ہوکر سری کانت نے انتہائی اقدام کرتے ہوئے زہر پی لیا۔ اسے تشویش ناک حالت میں اسپتال منتقل کیا گیا، مگر دورانِ علاج آج اس کی موت واقع ہوگئی۔

 

انجنیئر سری کانت کی موت کی اطلاع پر رشتہ داروں میں غم و غصہ پھیل گیا۔ اہلِ خانہ اور عزیز و اقارب نے نعش کو پولیس کی گاڑی کی چھت پر رکھ کر زبردست احتجاج کیا اور پولیس سے مطالبہ کیا کہ لڑکی کے والدین کے خلاف کارروائی کی جائے۔

 

پولیس نے مظاہرین سے بات چیت کرتے ہوئے صورتحال کو کنٹرول کرنے کی کوشش کی۔ مزید تحقیقات جاری ہیں۔