تلنگانہ میں چلتی ٹرین سے نو بیاہتا جوڑے کے پھسل کر ہلاک ہونے والے واقعہ کا نیا موڑ – تحقیقات میں چونکا دینے والا انکشاف
بھونگیر ضلع میں چلتی ٹرین سے نو بیاہتا جوڑے کے پھسل کر ہلاک ہونے والے واقعہ کا نیا موڑ ، تحقیقات میں چونکا دینے والا انکشاف
تلنگانہ کے بھونگیر ضلع کے وِنگاپلی–آلیر ریلوے روٹ پر جمعرات کی آدھی رات ایک دلخراش واقعہ پیش آیا، جس میں چلتی ٹرین سے گرنے کے باعث ایک نو بیاہتا جوڑا موقع پر ہی ہلاک ہو گیا۔ ابتدا میں اسے محض حادثہ تصور کیا جا رہا تھا، تاہم تحقیقات کے دوران سامنے آنے والی تفصیلات نے اس واقعہ کو نیا رخ دے دیا۔
ریلوے پولیس کے مطابق مہلوکین کی شناخت آندھرا پردیش کے پاروتی پورم ضلع کے ، راوپلی گاؤں سے تعلق رکھنے والے سمہاچلم (25) اور اسی ضلع کے انکوارم گاؤں کی رہنے والی بھوانی (19) کے طور پر کی گئی ہے۔ بتایا گیا ہے کہ دونوں کی شادی کو ابھی محض دو ماہ ہی ہوئے تھے۔
ذرائع کے مطابق سمہاچلم حیدرآباد کے مضافاتی علاقے میں ایک کیمیکل فیکٹری میں اپنے رشتہ داروں کے ساتھ کام کرتا تھا۔ یہ جوڑا وجئے واڑہ میں واقع اپنے گھر جانے کے لیے جمعرات کی رات سے مچھلی پٹنم ایکسپریس میں سوار ہوا تھا۔
ابتدائی طور پر بتایا گیا کہ ونگاپلی ریلوے اسٹیشن سے آگے بڑھنے کے بعد جب دونوں کوچ کے دروازے کے قریب کھڑے تھے تو توازن بگڑنے کے باعث حادثاتی طور پر نیچے گر پڑے، جس کے نتیجے میں دونوں کی موقع پر ہی موت واقع ہو گئی۔ تاہم بعد ازاں پولیس تحقیقات میں انکشاف ہوا کہ سفر کے دوران میاں بیوی کے درمیان کسی بات پر شدید تکرار ہوئی تھی۔
تحقیقات کے مطابق بھوانی نے جھگڑے کے دوران ریل سے چھلانگ لگانے کی دھمکی دی، جس پر سمہاچلم نے اسے روکنے کی کوشش کی۔ اسی دوران جذباتی کیفیت میں بھوانی اچانک چلتی ٹرین سے کود گئی۔ بیوی کو بچانے کی کوشش میں سمہاچلم بھی فوراً ریل سے چھلانگ لگا بیٹھا۔ ٹرین کی رفتار تیز ہونے کے باعث دونوں موقع پر ہی دم توڑ گئے۔ اس پورے واقعہ کی ویڈیو بھی ریل میں موجود ایک مسافر نے ریکارڈ کی، جو تفتیش میں اہم ثبوت سمجھی جا رہی ہے۔
ریلوے پولیس نے واقعہ کو حادثاتی موت کے طور پر درج کرتے ہوئے ویڈیو فوٹیج اور دیگر شواہد کی بنیاد پر مزید جانچ شروع کر دی ہے۔
