مولانا مفتی ڈاکٹر حافظ محمد صابر پاشاہ قادری نے عیدالاضحیٰ میں صفائی اور ماحولیاتی تحفظ کو اسلامی فریضہ قرار دیا

مولانا مفتی ڈاکٹر حافظ محمد صابر پاشاہ قادری نے عیدالاضحیٰ میں صفائی اور ماحولیاتی تحفظ کو اسلامی فریضہ قرار دیا

 

حیدرآباد، 25 مئی (پریس ریلیز):عیدالاضحیٰ صرف ایک مذہبی تہوار نہیں بلکہ روحِ ایثار، جذبۂ قربانی، اطاعتِ الٰہی اور انسانی ہمدردی کا عظیم پیغام ہے۔ یہ مقدس دن حضرت ابراہیم علیہ السلام اور حضرت اسماعیل علیہ السلام کی بے مثال فرمانبرداری کی یاد تازہ کرتا ہے، جہاں بندۂ مومن اپنے ربّ کی رضا کے لیے اپنی محبوب ترین شے قربان کرنے کا عملی مظاہرہ کرتا ہے۔ اسلام نے قربانی کو محض جانور ذبح کرنے کا عمل قرار نہیں دیا بلکہ اسے تقویٰ، صفائی، نظم و ضبط اور سماجی بھلائی کے ساتھ وابستہ کیا ہے۔ موجودہ دور میں جبکہ ماحولیاتی آلودگی اور موسمیاتی تبدیلی پوری دنیا کے لیے ایک سنگین مسئلہ بن چکی ہے، ایسے میں عیدالاضحیٰ کے موقع پر صفائی ستھرائی، ماحولیات کے تحفظ اور جدید ٹیکنالوجی کے مثبت استعمال کی اہمیت مزید بڑھ جاتی ہے۔

 

مولانا مفتی ڈاکٹر حافظ محمد صابر پاشاہ قادری، خطیب و امام مسجد تلنگانہ اسٹیٹ حج ہاؤز نامپلی حیدرآباد، نے اپنے ایک بیان میں فرمایا کہ قرآنِ مجید نے قربانی کی اصل روح کو بیان کرتے ہوئے ارشاد فرمایا:

“اللہ کو نہ ان کا گوشت پہنچتا ہے نہ خون، بلکہ اسے تمہارا تقویٰ پہنچتا ہے۔”

(سورۃ الحج: 37)

انہوں نے کہا کہ اس آیتِ مبارکہ سے واضح ہوتا ہے کہ قربانی کا مقصد محض رسم ادا کرنا نہیں بلکہ اخلاص، تقویٰ، نظم و ضبط اور اللہ تعالیٰ کی رضا کا حصول ہے۔ اگر قربانی کے دوران صفائی، ماحول اور پڑوسیوں کے حقوق کو نظر انداز کیا جائے تو یہ اسلامی تعلیمات کے منافی ہے۔ نبی کریم ﷺ نے صفائی کو ایمان کا حصہ قرار دیا اور راستے سے تکلیف دہ چیز ہٹانے کو صدقہ فرمایا، لہٰذا قربانی کے جانوروں کی آلائشیں، خون اور فضلات گلیوں، نالیوں اور کھلے مقامات پر پھینک دینا نہ صرف صحتِ عامہ کے لیے نقصان دہ ہے بلکہ اسلامی تہذیب کے بھی خلاف ہے۔

 

مولانا نے کہا کہ عیدالاضحیٰ کے دوران لاکھوں جانوروں کی قربانی کے نتیجے میں اگر مناسب صفائی اور فضلہ کی تلفی کا انتظام نہ ہو تو تعفن، بیماریوں اور ماحولیاتی آلودگی کے خطرات بڑھ جاتے ہیں۔ خون اور آلائشوں کو کھلے مقامات پر چھوڑ دینا بیکٹیریا، وائرس اور مچھروں کی افزائش کا سبب بنتا ہے، جس سے انسانی صحت، آبی ذخائر اور ماحول شدید متاثر ہو سکتے ہیں۔ اس لیے ضروری ہے کہ ہر مسلمان قربانی کے عمل کو شریعت کے آداب اور ماحولیاتی اصولوں کے مطابق انجام دے۔

 

مولانا مفتی ڈاکٹر حافظ محمد صابر پاشاہ قادری نے کہا کہ اسلام ایک مکمل ضابطۂ حیات ہے، جو عبادت کے ساتھ ماحولیات، صحت، صفائی اور انسانی حقوق کی بھی تعلیم دیتا ہے۔ زمین اللہ تعالیٰ کی امانت ہے اور انسان اس کا نگہبان ہے، اس لیے ماحول کو آلودہ کرنا یا دوسروں کے لیے تکلیف کا سبب بننا اسلامی روح کے خلاف ہے۔ قربانی کے موقع پر ہر فرد، ہر گھر اور ہر محلّے کو اپنی ذمہ داری محسوس کرتے ہوئے صفائی، نظم و ضبط اور حسنِ سلوک کا عملی مظاہرہ کرنا چاہیے۔

 

انہوں نے عوام سے اپیل کی کہ عیدالاضحیٰ کے مبارک موقع پر قربانی کو سنتِ ابراہیمی کے تقاضوں کے مطابق اخلاص، تقویٰ، صفائی ستھرائی اور ماحول دوستی کے ساتھ انجام دیں تاکہ یہ عظیم عبادت روحانی برکت کے ساتھ سماجی بھلائی اور ماحولیاتی تحفظ کا بھی ذریعہ بن سکے۔