بے قابو بس پلیٹ فارم میں گھس پڑی 9 سالہ لڑکا ہلاک بعض زخمی۔ مہاراشٹرا میں خوفناک حادثہ
ممبئی ۔ مہاراشٹرا کے ضلع ناسک کے سننر بس اسٹینڈ پر جمعرات کے روز ایک ریاستی ٹرانسپورٹ کی بس اچانک بے قابو ہوکر مسافروں سے بھرے پلیٹ فارم پر گھس پڑی جس کے نتیجے میں 9 سالہ بچہ موقع پر ہی ہلاک ہوگیا جبکہ کم از کم چار افراد زخمی ہوئے۔
ٹرمنل کی سی سی ٹی وی فوٹیج میں دکھائی دیتا ہے کہ بس اچانک تیزی سے پلیٹ فارم کی طرف بڑھتی ہے جس سے بریک فیل ہونے کا شبہ ظاہر کیا جا رہا ہے۔سرکاری حکام کے مطابق بس ابھی سننر اسٹینڈ میں داخل ہی ہوئی تھی کہ ڈرائیور کا اُس پر کنٹرول ختم ہوتا ہوا نظر آیا۔ گاڑی سیدھی پلیٹ فارم پر چڑھ گئی
اور وہاں کھڑے متعدد مسافروں کو ٹکر دے دی۔ حادثہ کے بعد مسافر اور قریبی دکاندار زخمیوں کو نکالنے کے لیے دوڑ پڑے جبکہ بس کچھ فاصلہ پر جاکر رک گئی۔حکام نے تصدیق کی ہے کہ بس حادثے میں ہلاک ہونے والے بچے کی شناخت آدرش بورڈے کے طور پر ہوئی ہے جس کی عمر 9 سال تھی۔
اطلاع کے مطابق بورڈے خاندان پنڈھر پور کے درشن کرکے اپنے گاؤں داپور سننر واپس لوٹ رہا تھا۔ حادثے کے وقت وہ سننر بس اسٹینڈ پر بس کے انتظار میں موجود تھے۔سوشل میڈیا پر تیزی سے وائرل ہونے والے سی سی ٹی وی فوٹیج میں دیکھا جا سکتا ہے کہ بس معمولی رفتار سے اسٹینڈ میں داخل ہوتی ہے لیکن اچانک بے قابو ہوکر پلیٹ فارم پر چڑھ جاتی ہے۔
ابتدائی معلومات کے مطابق بریک فیل ہونے کا شبہ ظاہر کیا گیا ہے تاہم گاڑی کی تکنیکی جانچ جاری ہے۔ ڈرائیور سے بھی طبیعت بہتر ہونے کے بعد پوچھ گچھ کی جائے گی۔
حادثے میں زخمی ہونے والے افراد کو قریبی اسپتال میں طبی امداد فراہم کی جارہی ہے۔
