تلنگانہ کے عادل آباد ضلع میں بس اور لاری میں تصادم – دو افراد ہلاک

عادل آباد – تلنگانہ کے ضلع عادل آباد میں پیش آنے والے ایک خوفناک حادثے میں حیدرآباد سے گورکھپور جانے والی پرائیویٹ بس تباہی کا شکار ہوگئی۔ واقعہ کل شب نیراڈی گوڑہ منڈل کے کُپتی گھاٹ کے قریب اس وقت پیش آیا جب بس بےقابو ہوکر سامنے سے آنے والی لاری سے زوردار ٹکرا گئی۔

 

حادثے کے نتیجے میں دو افراد موقع پر ہی دم توڑ گئے جبکہ تین مسافر شدید زخمی ہوئے، جنہیں فوری طور پر رمس، عادل آباد منتقل کیا گیا جہاں ان کا علاج جاری ہے۔

 

عینی شاہدین کے مطابق بس ڈرائیور کی لاپرواہی اور تیز رفتاری حادثے کا بنیادی سبب بنی۔ مسافروں کے مطابق ٹکر اتنی شدید تھی کہ بس کا اگلا حصہ مکمل طور پر تباہ ہو گیا۔

 

پولیس نے موقع پر پہنچ کر ریسکیو کارروائیاں انجام دیں اور معاملے کی تفتیش شروع کر دی ہے۔ ابتدائی تحقیقات میں تیز رفتاری کی تصدیق ہوئی ہے جبکہ ڈرائیور کی غفلت کے پہلو بھی زیرِ غور ہیں۔

 

مسافروں کی شناخت اور مزید تفصیلات پولیس کی جانب سے جلد جاری کیے جانے کا امکان ہے۔