حیدرآباد کے دیوان دیوڑھی کی ایک عمارت میں بھیانک آگ لگنے کا واقعہ – 30 کپڑے کے دکانات جل گئیں ؛ کروڑوں روپے کا نقصان
حیدرآباد کے پرانے شہر کے دیوان دیوڑھی میں پیر کی صبح مدینہ عباس ٹاورس میں بڑے پیمانہ پر آگ لگ گئی۔عمارت کی چوتھی منزل پر لگی آگ،تیزی سے پھیلتی چلی گئی۔اس آگ نے تقریبا 30دکانات کو اپنی لپیٹ میں لے لیا۔
اس واقعہ میں کئی کروڑروپئے کا نقصان ہوا۔ دوسری اورتیسری منزل پر کپڑے کی دکان میں اچانک آگ بھڑک اٹھی۔ اطلاع ملتے ہی پولیس اور فائر بریگیڈ کا عملہ وہاں پہنچ گیا۔ فائر فائٹر کے عملہ نے کافی جدوجہد کے بعد آگ پر قابو پالیا۔تاجروں نے بتایا کہ اس واقعہ کے نتیجہ میں بڑے پیمانہ پر مالی نقصان ہوا ہے۔
آگ لگنے کا واقعہ ایک بجے رات کے بعد پیش آیا اوردو بجے کے بعد فائراسٹیشن کو آگ کے واقعہ کی اطلاع ملی۔فوری طورپرمغلپورہ کے ساتھ ساتھ دیگر اسٹیشنوں کی 14گاڑیوں کے ذریعہ آگ بجھانے کا کام انجام دیاگیا۔آگ بجھانے میں فائربریگیڈ کے عملہ کو کافی دشواری کا سامنا کرناپڑاکیونکہ اس علاقہ میں تنگ گلیاں ہیں۔فائربریگیڈ کے عملہ نے متصل عمارت پر چڑھ کرپانی کے انتظام کو یقینی بنایا
۔عمارت میں کپڑوں کی دکانات تھیں۔آگ لگنے کی وجہ کی جانچ کی جارہی ہے۔ رمضان کے پیش نظر کپڑے کی دکانوں کے مالکان نیا اسٹاک لے کر آئے جنہوں نے اس واقعہ پر مایوسی کااظہار کیا۔
