جرائم و حادثات

تلنگانہ کے جگتیال ضلع  میں بھیانک آتشزدگی — 20 کھلونوں کی دکانیں جل کر خاکستر، کروڑوں کا نقصان

تلنگانہ کے جگتیال ضلع  میں بھیانک آتشزدگی — 20 کھلونوں کی دکانیں جل کر خاکستر، کروڑوں کا نقصان

 

جگتیال ضلع کے ملیال منڈل کے سیاحتی مقام کونڈاگٹو میں ہفتہ کی نصف شب بھیانک آتشزدگی کا واقعہ پیش آیا، جس میں کھلونوں اور دیگر سامان سے مزین تقریباً 20 دکانیں آگ کی لپیٹ میں آکر مکمل طور پر جل کر راکھ ہوگئیں۔ ابتدائی اطلاعات کے مطابق آگ اچانک بھڑکی اور دیکھتے ہی دیکھتے پورے مارکیٹ ایریا میں پھیل گئی۔ مقامی افراد کا کہنا ہے کہ واقعہ کی ممکنہ وجہ شارٹ سرکٹ ہوسکتی ہے، تاہم سرکاری طور پر تصدیق ابھی باقی ہے۔

 

آگ اتنی شدید تھی کہ پلاسٹک کے کھلونوں کی وجہ سے شعلے تیزی کے ساتھ پھیلتے گئے اور دکانداروں کی برسوں کی کمائی لمحوں میں جل کر خاک ہو گئی۔ تخمینے کے مطابق ایک کروڑ روپے سے زائد مالیت کا نقصان ہوا ہے۔ اپنی دکانیں جلتے دیکھ کر کئی دکاندار بے بسی کے عالم میں سڑک کنارے رو پڑے۔

 

اطلاع ملتے ہی پولیس اور فائر ڈیپارٹمنٹ موقع پر پہنچے اور طویل جدوجہد کے بعد آگ پر قابو پایا گیا۔ حادثے میں کسی جانی نقصان کی اطلاع نہیں، البتہ متاثرہ دکانداروں نے الزام عائد کیا کہ فائر انجن بروقت نہ آنے کے سبب نقصان میں اضافہ ہوا۔

 

دکانداروں کا کہنا ہے کہ ان کی روزی روٹی کا واحد ذریعہ یہی کاروبار تھا، جو مکمل طور پر تباہ ہوگیا ہے۔ انہوں نے حکومت سے فوری امدادی پیکیج اور بحالی کے اقدامات کا مطالبہ کیا ہے۔

 

 

متعلقہ خبریں

Back to top button