سیلفی اور ویڈیو بنانے کے شوق نے تین سہیلیوں کی جان لے لی – ویڈیو نے ہر آنکھ نم کردی

دل دہلا دینے والا واقعہ: سیلفی کی خوشی پل بھر میں قیامت بن گئی، ویڈیو نے ہر آنکھ نم کر دی

 

آندھرا پردیش کے ضلع الوری سیتا رام راجو میں پیش آنے والا  دردناک حادثہ اب سوشل میڈیا پر وائرل ویڈیو کے بعد مزید دل کو جھنجھوڑ دینے والا بن گیا ہے، جہاں چند لمحوں کی خوشی ہمیشہ کے لیے ماتم میں بدل گئی۔

 

تفصیلات کے مطابق چار سہیلیاں—تریشا (17)، رتنا کماری (16)، پویترا (16) اور انجلی—چھٹیوں کے دوران گاؤں آئی ہوئی تھیں اور قریبی آبشار پر سیر کے لیے گئی تھیں۔ خوشی اور جوش کے عالم میں وہ آبشار کے کنارے سیلفی اور ویڈیوز بنا رہی تھیں کہ اچانک ایک لڑکی پھسل کر گہرے پانی میں جا گری۔ اسے بچانے کی کوشش میں باقی تین بھی یکے بعد دیگرے پانی میں گر گئیں۔

 

مقامی افراد نے فوری طور پر ریسکیو کی کوششیں کرتے ہوئے لڑکیوں کو باہر نکالا، مگر تب تک بہت دیر ہو چکی تھی۔ تریشا، رتنا کماری اور پویترا پانی میں ڈوب کر دم توڑ چکی تھیں، جبکہ انجلی زخمی حالت میں بچ گئی۔

 

اس دلخراش واقعے کی ویڈیو منظر عام پر آنے کے بعد ہر دیکھنے والا افسوس اور دکھ میں ڈوب گیا ہے۔ ویڈیو میں قہقہوں سے بھرے لمحات کو اچانک چیخوں اور بے بسی میں بدلتے دیکھا جا سکتا ہے، جو کسی بھی دل کو دہلا دینے کے لیے کافی ہے۔

 

یہ چاروں لڑکیاں ایک ہی گاؤں اور ایک ہی خاندان سے تعلق رکھتی تھیں۔ تین کمسن بچیوں کی ایک ساتھ موت نے پورے گاؤں کو سوگوار کر دیا ہے، اور ہر طرف غم کی فضا چھا گئی ہے۔