چلتی بس میں لگی بھیانک آگ 35 مسافرین بال بال بچ گئے

نئی دہلی: اتر پردیش کے کانپور میں جمعہ کی صبح ایک چلتی ہوئی بس میں آگ لگ گئی تاہم بس میں سوار کم از کم 35 مسافر بال بال بچ گئے۔ حکام کے مطابق آگ تیزی سے پوری بس میں پھیل گئی اور چند ہی منٹوں میں اسے مکمل طور پر جلا کر

 

 

خاکستر کر دیا۔ یہ بس دہلی سے وارانسی جا رہی تھی اور تقریباً صبح 10:30 بجے نوبستہ راما دیوی نیشنل ہائی وے پر راما دیوی چوراہے کے قریب اس میں آگ بھڑک اٹھی۔ واقعے میں کسی جانی نقصان کی اطلاع نہیں ملی۔حکام کے مطابق کئی مسافروں نے فوراً بس سے نکلنے کی کوشش کی کچھ نے کھڑکیوں کے شیشے توڑ کر باہر چھلانگ لگا دی۔

 

 

اطلاع ملتے ہی پولیس موقع پر پہنچی اور باقی مسافروں کو بھی محفوظ نکال لیا۔ بس اور اس میں موجود تمام سامان مکمل طور پر جل کر تباہ ہو گیا۔چکری پولیس اسٹیشن کے انچارج اجے پرکاش مشرا نے بتایا ’’فائر بریگیڈ کی ٹیم موقع پر پہنچی اور کافی کوشش کے بعد آگ پر قابو پایا۔ آگ لگنے سے

 

 

ہائی وے پر ٹریفک جام ہو گیا تھا۔ بس کو سڑک کے کنارے ہٹا دیا گیا ہے اور ٹریفک کی روانی بحال کرنے کی کوششیں جاری ہیں۔ آگ لگنے کی وجہ کی تفتیش کی جا رہی ہے۔