13 سالہ لڑکا اور 14 سالہ لڑکی گھر سے فرار، پولیس نے حیدرآباد میں پکڑ لیا
آندھراپردیش کے کرشنا لَنکا ٹاؤن میں کم عمر لڑکا اور لڑکی گھر سے فرار — پولیس نے حیدرآباد سے بازیاب کرا کے والدین کے حوالے کردیا
آندھراپردیش کے کرشنالَنکا علاقے سے تعلق رکھنے والے دو کم عمر طلبہ، ایک لڑکا (عمر 13 سال، آٹھویں جماعت) اور لڑکی (عمر 14 سال، نویں جماعت) کم سنی کی عمر میں محبت کے جذبات میں بہہ کر ساتھ رہنے کی نیت سے گھر سے فرار ہوگئے۔ دونوں ایک ہی اسکول میں تعلیم حاصل کر رہے تھے اور پچھلے دو برسوں سے ایک دوسرے کو جانتے تھے۔ وہ خود کو ایک دوسرے سے محبت کرنے والے سمجھتے تھے۔
چہارشنبہ کے روز لڑکے کی سالگرہ تھی۔ وہ اسکول نہیں گیا، جبکہ لڑکی نے گھر والوں سے اسکول جانے کا بہانہ کیا اور سیدھی لڑکے کے گھر پہنچی۔ اس وقت لڑکے کے والدین گھر پر موجود نہیں تھے۔ دونوں نے مل کر کیک کاٹا، بعد میں لڑکا اسکول گیا اور دوستوں میں چاکلیٹس تقسیم کرکے واپس آگیا۔ لڑکی اپنے گھر لوٹ گئی۔
دوپہر کے کھانے کے بعد لڑکی نے پھر اسکول جانے کا بہانہ کیا اور لڑکے کے گھر آگئی۔ اس کے بعد لڑکا اپنے والد کا موبائل فون اور گھر سے 10 ہزار روپے لے کر لڑکی کے ساتھ حیدرآباد کے لیے روانہ ہوگیا۔
جب لڑکی اسکول وقت گزرنے کے باوجود گھر واپس نہیں آئی تو گھر والوں نے اسکول میں پوچھ گچھ کی جہاں پتا چلا کہ وہ اسکول آئی ہی نہیں۔ تلاش بے سود ہونے پر والدین نے کرشنا لَنکا پولیس اسٹیشن میں شکایت درج کروائی۔ پولیس نے سی سی ٹی وی فوٹیج کی جانچ کی تو لڑکی اور لڑکے کو اسکول یونیفارم میں ایک ساتھ جاتے دیکھا گیا۔
اسی دوران لڑکے کے والدین نے بھی اپنے بیٹے کی گمشدگی کی شکایت کی۔ ابتدائی تحقیقات میں واضح ہوا کہ دونوں حیدرآباد جا چکے ہیں۔ پولیس نے لڑکے کے موبائل فون کی نگرانی کی۔ فون بند ہونے کے بعد جیسے ہی آن ہوا اس کی لوکیشن سے پتہ چلا کہ وہ حیدرآباد میں ہیں، جس پر پولیس فوراً وہاں روانہ ہو گئی۔
چہارشنبہ کی رات تقریباً 10 بجے دونوں نابالغ بچے حیدرآباد کے ونستھلی پورم پہنچے اور پھر آٹو رکشہ کے ذریعے تکو گوڑہ علاقہ گئے جہاں وہ کرایہ کے گھر کی تلاش میں تھے۔ یہ صورتحال دیکھ کر ایک آٹو ڈرائیور نے انہیں گھر لے جا کر تفصیلات معلوم کیں اور والدین کو اطلاع دی۔
اسی دوران پولیس بھی وہاں پہنچ گئی اور دونوں نابالغ بچوں کو تحویل میں لے کر انہیں واپس وجے واڑہ لے آئی اور والدین کے حوالے کردیا۔
