فیس بُک پر دوستی – شادی کے 50 دن بعد خاتونِ سافٹ ویئر انجینئر کی خودکشی

حیدرآباد کے مضافاتی علاقے میاں پور میں ایک افسوسناک واقعہ پیش آیا، جہاں شادی کے محض 50 دن بعد ایک نوجوان خاتون نے مبینہ طور پر خودکشی کر لی۔

پولیس کے مطابق، بہار سے تعلق رکھنے والی 26 سالہ ایشیکا یادو، جو ایک سافٹ ویئر انجینئر تھیں، کی ملاقات پانچ سال قبل فیس بک کے ذریعے مدھیہ پردیش کے رہائشی نیرج بنسال سے ہوئی تھی، جو گچیباؤلی کی ایک اسٹارٹ اپ کمپنی میں ملازمت کرتا تھا۔ دونوں کے درمیان دوستی محبت میں بدل گئی، جس کے بعد خاندان والوں کی رضامندی سے 10 فروری کو پٹنہ میں شادی انجام پائی اور جوڑا میاں پور کے ایک اپارٹمنٹ میں رہائش پذیر تھا۔

چہارشنبہ کو ایشیکا نے اپنے گھر میں پنکھے سے لٹک کر خودکشی کر لی۔ انہیں فوری طور پر اسپتال منتقل کیا گیا، تاہم ڈاکٹروں نے انہیں مردہ قرار دے دیا۔

متوفیہ کے والدین نے پولیس میں شکایت درج کراتے ہوئے الزام لگایا کہ شوہر کی جانب سے اضافی جہیز، سونے اور ہیرے کے زیورات کے مطالبات اور ہراسانی کے باعث ان کی بیٹی شدید ذہنی دباؤ کا شکار تھی، جس کے نتیجے میں اس نے یہ انتہائی قدم اٹھایا۔ پولیس نے مقدمہ درج کرکے تحقیقات شروع کر دی ہے۔