حیدرآباد کے پرانے شہر میں بھیانک آگ لگنے کا واقعہ
حیدرآباد/ حیدرآباد کے پرانے شہر میں واقع فلک نما کے علاقے فاروق نگر میں گزشتہ روز خطرناک آگ بھڑک اٹھی جس نے مقامی شہریوں میں خوف اور تشویش پیدا کر دی۔ مقامی ذرائع کے مطابق یہ آگ ایک دکان میں اچانک لگی جو بس ڈپو کے قریب واقع ہے۔
ابتدائی طور پر یہ چھوٹی سی آگ لگتی تھی لیکن چند لمحوں میں اس نے شدت اختیار کر لی اور قریب میں موجود فرنیچر شاپ سمیت دیگر تجارتی دکانوں تک پھیل گئی۔ آگ کی شدت اور ہواؤں کی سمت کی وجہ سے علاقے میں دھواں پھیل گیا۔ لوگ خوفزدہ ہو گئے۔
اطلاع ملنے پر فوری طور پر فائر بریگیڈ کی ٹیمیں جائے وقوعہ پر پہنچیں اور آگ پر قابو پانے کی کارروائی شروع کی۔ مقامی پولیس بھی موقع پر موجود تھی تاکہ لوگوں کی حفاظت اور علاقے کی نگرانی کو یقینی بنایا جا سکے۔
خاص طور پر اس علاقے میں انڈین گیس گودام موجود ہونے کی وجہ سے پولیس اور فائر بریگیڈ کے اہلکار انتہائی محتاط رہے۔اب تک اطلاعات کے مطابق کوئی جانی نقصان نہیں ہوا تاہم دکانوں میں مال اور سامان شدید نقصان کا شکار ہو گیا ہے اور حادثہ کی وجہ سے اس مصروف ترین سڑک پر ٹریفک کے نظام میں خلل پڑا۔
