حیدرآباد میں ریلز کا خطرناک جنون — بائیک اسٹنٹس کرتے نوجوانوں کی ویڈیو وائرل
حیدرآباد میں نوجوانوں میں ریلز بنانے کے لئے خطرناک جنون تیزی سے بڑھتا جا رہا ہے۔ تازہ واقعہ میں چند لڑکوں نے شہر کی مصروف سڑکوں پر بائیکوں پر خطرناک اسٹنٹس کرتے ہوئے ویڈیو بنائی اور اسے سوشل میڈیا پر ریل کے طور پر اپلوڈ کیا، جو دیکھتے ہی دیکھتے وائرل ہوگئی۔
ویڈیو میں نوجوان بغیر ہیلمٹ تیز رفتار بائک چلاتے ہوئے ون وہیلنگ، اسکیٹنگ اسٹائل رائیڈنگ اور دیگر خطرناک کرتب کرتے دکھائی دے رہے ہیں جبکہ پیچھے سے آنے والی ٹریفک کئی بار خوفناک حد تک قریب پہنچ گئی۔
عوام اور سوشل میڈیا صارفین نے اس ویڈیو پر شدید برہمی کا اظہار کرتے ہوئے کہا کہ ایسے اسٹنٹس صرف اپنی ہی نہیں بلکہ دوسروں کی جان کو بھی خطرے میں ڈالنے کے مترادف ہیں۔
اطلاعات کے مطابق پولیس نے ویڈیو کا نوٹس لے لیا ہے اور چہروں کی شناخت کے لئے ٹیکنالوجی کی مدد سے جانچ شروع کردی ہے۔ ملوث نوجوانوں کے خلاف جرمانے، گاڑی کی ضبطی اور جیل کی سزائیں بھی ممکن ہیں۔
ٹریفک پولیس نے والدین سے اپیل کی ہے کہ وہ اپنے بچوں کی سرگرمیوں پر نظر رکھیں اور نوجوانوں کو سستی شہرت کی خاطر اپنی زندگی خطرے میں ڈالنے سے روکیں۔
خبردار بائیک اسٹنٹس صرف ٹرینڈ نہیں بلکہ جان لیوا شوق ثابت ہو رہے ہیں، اور ایسے واقعات میں اب تک کئی نوجوان اپنی جانیں گنوا چکے ہیں۔
