فیس بک پر انجان خاتون سے دوستی – حیدرآباد کا ڈاکٹر 14 کروڑ روپے سے محروم

تلنگانہ میں ایک بڑا سائبر دھوکہ دہی کا معاملہ منظرِ عام پر آیا ہے جس میں حیدرآباد کے ایک ڈاکٹر کو سرمایہ کاری کے نام پر تقریباً 14 کروڑ روپے سے محروم کر دیا گیا۔

 

تفصیلات کے مطابق ایک خاتون نے خود کو ’مونیکا مادھون‘ کے نام سے فیس بک پر متعارف کراتے ہوئے ڈاکٹر سے دوستی کی اور ایک جعلی ٹریڈنگ ویب سائٹ کا لنک بھیجا۔ بڑے منافع کی لالچ دے کر انہوں نے ڈاکٹر کو بھاری رقوم جمع کرانے پر آمادہ کیا اور بعد میں رقم نکالنے کے لئے ٹیکس ادا کرنے کا بہانہ بنایا۔

 

بار بار دباؤ ڈالے جانے کے بعد ڈاکٹر نے لاکھوں نہیں بلکہ کروڑوں روپے ٹیکس کے نام پر ادا کر دیے لیکن پھر بھی اس کے اکاؤنٹ میں کوئی رقم منتقل نہیں ہوئی تو اسے دھوکہ دہی کا احساس ہوا۔

 

متاثرہ ڈاکٹر نے فوری طور پر سائبر سکیورٹی بیورو سے شکایت درج کرائی جس کے بعد پولیس نے معاملے کی تحقیقات شروع کر دی ہیں۔

 

سائبر پولیس نے عوام کو دوبارہ خبردار کیا ہے کہ ایسے آن لائن سرمایہ کاری کے جال میں پھنس کر اپنی محنت کی کمائی سے ہاتھ نہ دھو بیٹھیں۔