حیدرآباد میں انسپکٹر اور سب انسپکٹر 2 لاکھ رشوت لیتے ہوئے پکڑے گئے

انسپکٹر اور سب انسپکٹر 2 لاکھ رشوت لیتے                             ہوئے پکڑے گئے

حیدرآباد ۔ حیدرآباد میں ایک ملزم سے 15 لاکھ روپے رشوت طلب کرنے والے انسپکٹر اور سب انسپکٹر کو اے سی بی حکام نے رنگے ہاتھوں گرفتار کر لیا۔

 

شمس آباد ایئرپورٹ پولیس اسٹیشن آؤٹ پوسٹ کے سی آئی کنکیا اور ایس آئی سدھیشور نے ایک ملزم سے کہا تھا کہ اگر وہ چارج شیٹ جلد داخل کروانا چاہتا ہے تو اسے 15 لاکھ روپے دینے ہوں گے۔

 

کیرالہ سے تعلق رکھنے والا ایک شخص پہلے نقلی پاسپورٹ کے ساتھ ایئرپورٹ پر پکڑا گیا تھا۔ اس کے خلاف مقدمہ درج کر کے اسے ریمانڈ پر بھیج دیا گیا تھا۔ بعد میں وہ ضمانت پر رہا ہو گیا اور ہر اتوار پولیس اسٹیشن میں حاضری دے رہا تھا۔

 

بتایا گیا ہے کہ اسی دوران ایس آئی سدھیشور نے اس سے کہا کہ اگر وہ چارج شیٹ جلد داخل کروانا چاہتا ہے تو اسے 15 لاکھ روپے دینے ہوں گے۔ جب متاثرہ شخص نے کہا کہ اس کے پاس اتنی رقم نہیں ہے تو الزام ہے کہ ایس آئی نے غصہ میں آ کر دھمکی دی کہ اگر پیسے نہیں دیے تو وہ اس کے خاندان کے افراد کو بھی کیس میں پھنسا دے گا۔

 

اس پر متاثرہ شخص نے 5 لاکھ روپے دینے پر رضامندی ظاہر کی لیکن رشوت دینے کی نیت نہ ہونے کی وجہ سے اس نے اے سی بی حکام سے رابطہ کیا اور پوری بات بتائی۔

 

جس کے بعد اے سی بی کے ڈی ایس پی آنند کمار کی قیادت میں کارروائی کی گئی اور ایئرپورٹ پولیس اسٹیشن آؤٹ پوسٹ میں ایس آئی سدھیشور کو 2 لاکھ روپے لیتے ہوئے رنگے ہاتھوں پکڑ لیا گیا۔

 

اس کیس میں سی آئی کنکیا کے ملوث ہونے کے سبب انہیں بھی حراست میں لے لیا گیا ہے اور دونوں کے خلاف مقدمہ درج کر کے تحقیقات جاری ہیں۔