حیدرآباد۔ پرانے شہر کے علاقہ فلک نما میں نوجوان کا قتل

حیدرآباد۔ پرانے شہر کے علاقہ فلک نما نوجوان کا قتل

حیدرآباد۔ حیدرآباد کے پرانے شہر کے فلک نما علاقے میں ایک 27 سالہ نوجوان ماجد کو بے رحمی سے قتل کرنے کا واقعہ پیش آیا جس سے علاقے میں سنسنی پھیل گئی ہے۔ واقعہ تیگل کنٹہ کے قریب کلاسک اسٹار پان محل کے پاس پیش آیا جہاں کچھ نامعلوم حملہ آوروں نے مجید پر اچانک خنجروں سے حملہ کیا اور شدید زخمی کر دیا۔

 

عینی شاہدین کے مطابق مجید موقع پر موجود تھا جب اچانک چند افراد نے اس پر حملہ کر دیا۔ وہ چیختا رہا لیکن حملہ آوروں نے کسی قسم کی رعایت نہیں کی اور اسے خون میں لت پت چھوڑ کر فرار ہو گئے۔ مقامی افراد نے فوری طور پر پولیس کو اطلاع دی اور زخمی مجید کو قریبی ہاسپٹلس منتقل کیا گیا جہاں وہ زخموں کی تاب نہ لاتے ہوئے دم توڑ گیا۔

 

پولیس نے فوری طور پر علاقہ کو گھیرے میں لے لیا اور شواہد اکٹھا کرنے کا عمل شروع کیا۔ ایڈیشنل ڈی سی پی موقع پر پہنچے اور جائے واردات کا معائنہ کیا۔ پولیس سی سی ٹی وی فوٹیج کی مدد سے حملہ آوروں کی شناخت کی کوشش کر رہی ہے اور ممکنہ مشتبہ افراد سے پوچھ گچھ بھی شروع کر دی گئی ہے۔

 

فلک نما اور اطراف کے علاقوں میں چیکنگ کا عمل تیز کر دیا گیا ہے تاکہ حملہ آوروں کو جلد گرفتار کیا جا سکے۔ واقعہ کے بعد علاقہ میں خوف و ہراس کا ماحول ہے اور مقتول کے رشتہ داروں نے پولیس سے مطالبہ کیا ہے کہ حملہ آوروں کو فوری گرفتار کیا جائے اور سخت سزا دی جائے تاکہ ایسے واقعات کا اعادہ نہ ہو۔

 

پولیس نے مجید کی نعش کو پوسٹ مارٹم کے لیے منتقل کر دیا ہے اور قتل کا مقدمہ درج کرتے ہوئے حملہ آوروں کی تلاش کیلئے مختلف ٹیمیں تشکیل دی گئی ہیں۔